Тугыз ай эчендә Казан май комбинаты әзер продукция сату күләмен 61%ка арттырган
Агымдагы елның тугыз ае йомгаклары буенча Казан май комбинаты (КМК) 803,1 мең тонна товар продукциясе җитештергән. 2022 елның шул ук чоры белән чагыштырганда бу күрсәткеч 50%ка арттыграк.
Майонезлар һәм кетчуплар җитештерү күләме - 19%ка, соуслар - 23%ка, шешәләрдәге май 57%ка арткан. Гомумән, көнбагыш мае җитештерү - 52%ка, рапс мае җитештерү ике тапкыр арткан.
Тугыз ай йомгаклары буенча Казан май комбинатының әзер продукциясен сату күләме 61%ка арткан һәм ул 657,5 мең тонна тәшкил итә. Шешәләрдәге май 62%ка күбрәк сатылган. Узган елның шул ук чоры белән чагыштырганда соуслар сату - 33 процентка, кетчуплар - 25 процентка, майонезлар 18 процентка арткан. Көнбагыш мае - ике тапкыр, ә рапс мае 4 тапкырдан артык сатылган.
“Быел комбинат рапс һәм көнбагыш эшкәртүне бөтен сезон дәвамында алып барды - бу үсемлек майларын гомуми җитештерүне арттырырга мөмкинлек бирде. Моннан тыш, без сату базарларын киңәйттек һәм экспортлауның яңа юнәлешләрен ачтык, шул исәптән Кытай, – дип сөйләде “Казан май комбинаты” АҖ генераль директоры Дмитрий Максимов. - Майонезларга килгәндә, без иң популяр категорияләрдән «Провансаль» һәм «Оливковый» майларын сатуны арттырдык. Kisoy һәм Mr.Ricco брендлары белән соуслар, шулай ук пэт-пакетлардагы кетчуплар үзләренең тотрыклы үсеш динамикасын күрсәттеләр.
Әзер продукцияне сатудан комбинатның кереме 27%ка арткан һәм 30,2 млрд.сум тәшкил итә (НДСтан башка).
Казан май комбинатының хезмәт җитештерүчәнлеге 14%ка арткан.