Татарстан иң озын кыяр үстерү буенча Россиядә яңа рекорд куйды
Казан янындагы Салмачы бистәсендә тарихи вакыйга булды: биредә шәхси яшелчә бакчасында үстерелгән кыяр озынлыгы буенча рәсми рәвештә Россия рекорды дип танылды. Әлеге күренеш Халыкара рекордлар теркәү системасы INTERRECORD экспертлары тарафыннан теркәлгән һәм Россия Рекордлар реестрына кертелгән.
“Казан янындагы шәхси парникта үстерелгән Россиянең иң озын кыяры рәсми рәвештә бакчачылык рекорды булып танылды. Ул Россиянең заманча рекордлары фәнни үзәкләрдә һәм махсуслаштырылган хуҗалыкларда гына түгел, ә гадәти йорт яны кишәрлекләрендә дә була алуын раслый”, - дип билгеләп үтте Татарстан Республикасы авыл хуҗалыгы һәм азык-төлек министры урынбасары Рөстәм Гайнуллов Татарстан Республикасы Бакчачылар съездында.
Һәвәскәр бакчачы Әминә Вахитова, 2025 елның язында «Восточный деликатес» сортлы орлыклар утыртып, әлбәттә инде, аларны рекорд кую өчен үстерергә җыенмаган. Яшелчәләр үзләренә ашау өчен үстерелә. Әмма теплицадагы кыярларның берсе гадәттән тыш зур булып үсә башлый. Озынлыгы буенча аның Россиядә элек теркәлгән барлык күрсәткечләрне узып китүе ачыклана.
“Мин күп еллар инде парникта яшелчәләр үстерәм. Су сибү, карау, органик ашламалар куллану кебек бар нәрсә дә гадәттәгечә булды. Әмма бу кыярның башкаларыннан аерылып торуын күрдем. Ниндидер бер мизгелдә мин аңа гадәти кыяр кебек карамыйча, аның ничек һәм күпмегә кадәр үсүен күзәтә башладым”, - ди Әминә Вахитова.
Татарстан Республикасы Авыл хуҗалыгы һәм азык-төлек министрлыгы вәкилләре белән бергә башкарылган җентекле контроль үлчәүләрдән соң кыярның рекордлы озынлыгы билгеләнгән, ул 93 см була. Моннан тыш, аның авырлыгы - 2 820 грамм, ә диаметры - 23 см. Бу параметрлар рәсми рәвештә теркәлгән һәм Илкүләм реестрга кертелгән.
Бу рекорд моңа кадәр билгеләнгән күрсәткечләрне узып киткән, мәсәлән, 2024 елның октябрендә Аурика Рехалова тарафыннан үстерелгән кыярның озынлыгы 85 см булган, Татьяна Николаеваныкы (Адыгея Республикасы) 83 см һәм Елена Агафонованыкы (Краснодар крае) 63 см булган. Шулай итеп, әлеге нәтиҗә Россия Рекордлар реестры тарихына теркәлгән казаныш, Илкүләм рекордлар системасы өчен яңа ориентир һәм Россиянең тотрыклы һәм үз-үзен тәэмин итүдә шәхси ярдәмче хуҗалыкларның өлешен күрсәтүче потенциал буларак кереп калды.