Марат Кәримов Әлки районында авыл хуҗалыгы техникасының 2026 елгы язгы кыр эшләренә әзерлеге белән танышты
18 февральдә Татарстан Республикасы Авыл хуҗалыгы һәм азык-төлек министрлыгының механизация бүлеге белгечләре техниканы кыр эшләренә әзерләүнең барышын мониторинглау максатыннан Әлки, Әлмәт, Зеленодольск, Балык Бистәсе, Түбән Кама, Чирмешән районнары хуҗалыкларына чыктылар.
Тракторлар, чәчү һәм туфрак эшкәртү техникасы 15 мартка әзер булырга тиеш, дигән таләпләр куелган иде. Министрлык хуҗалыкларның 2026 елгы язгы кыр эшләренә комплекслы әзерлеген кабул итүне якынча 23-27 март көннәренә планлаштыра.
Бүген Татарстан Республикасы авыл хуҗалыгы һәм азык-төлек министры урынбасары Марат Кәримов Татарстан Республикасының Әлки муниципаль районында булды. Аны Татарстан Республикасының Әлки районының Авыл хуҗалыгы һәм азык-төлек идарәсе башлыгы Роберт Һадиев озата йөрде.
Сәфәр барышында Марат Кәримов «Востокзернопродукт» АҖ МТП территориясен карап чыкты, компания җитәкчесе һәм хезмәткәрләре белән аралашты, авыл хуҗалыгы техникасын әзерләүнең барышы һәм аның нинди этапларда булуы турында фикер алышты.
Аннары министр урынбасары Базарлы Матак авылында Алексеевск аграр көллияте филиалында булды һәм көллият директоры Эльвира Нуруллина белән аралашты. Алар аграр көллият эше турында фикер алыштылар.
"Монда авыл хуҗалыгы җитештерүендә эшли торган тракторчы-машинист һөнәрен үзләштерәләр. Тракторчы һөнәре районда бик популяр һәм кирәкле, тракторда эшләүдән тыш, безнең чыгарылыш укучылары комбайнда һәм башка төр авыл хуҗалыгы техникасында да эшли алалар",- дип билгеләп үтте ул.
Аннары алар «Көньяк Әлки» территориаль идарәсендә һәм остаханәсендә булдылар, анда авыл хуҗалыгы техникасын әзерлек линиясенә чыгару һәм аны 2026 елгы язгы кыр эшләренә әзерләүнең барышы белән таныштылар.
Марат Кәримов шулай ук «Хузангай» ҖЧҖ хуҗалыгында булды, терлек азыгы үзәгенең, май-сыр заводының һәм куертылган сөт әзерләү цехының эшен бәяләде. Биредә җитештерү күләмнәрен арттыру, мөгезле эре терлекләрне тоту шартлары, азык запасларының структурасы һәм җайланмаларның эшкә яраклылыгы мәсьәләләре буенча фикер алыштылар. Чарада катнашучылар авыл хуҗалыгы техникасы музеенда булдылар.
"Хузангай" ҖЧҖ предприятиесе - ул күп төрле продукция җитештерә торган киң профильле авыл хуҗалыгы предприятиесе.
Сәфәр азагында министр урынбасары шулай ук автогараж төзелешенең барышы белән танышты һәм катнаш азык эшкәртү буенча җитештерү участогында булды.