«Казан Агро - 2026» авыл хуҗалыгы күргәзмәсе кунаклар көтә
Бүген «Татар-информ» мәгълүмат агентлыгында «Казан Агро-2026» махсуслаштырылган авыл хуҗалыгы күргәзмәсенә багышланган матбугат конференциясе узды. Күргәзмә 11 февральдән 13 февральгә кадәр «Казан Экспо» халыкара күргәзмә үзәгендә узачак һәм Идел буе төбәкләренең агросәнәгать комплексы предприятиеләре, фермер хуҗалыклары, фәнни үзәкләре һәм идарә органнары вәкилләре белән 300дән артык компанияне һәм 12 000нән артык белгечне берләштерәчәк.
Татарстан Республикасы авыл хуҗалыгы һәм азык-төлек министрының беренче урынбасары Ленар Гарипов, мәйданчык авыл хуҗалыгы товар җитештерүчеләре, фән, бизнес, тармак министрлыклары һәм ведомстволары вәкилләре арасында продуктив диалог, алдынгы тәҗрибә уртаклашу һәм АПК белгечләренең һөнәри дәрәҗәсен күтәрү, потенциаль партнерлар белән яңа проектлар буенча сөйләшүләр алып бару өчен мөһим урын булып тора, дип ассызыклады.
Күргәзмә тематикасы, гадәттәгечә, киң колачлы, ул, техника һәм запас частьләр, терлекчелек, үсемлекчелек, цифрлаштыру, азык-төлек сәнәгате, эшкәртү һәм саклау, мәгариф һәм фәнне дә кертеп, АПКның барлык төп юнәлешләрен үз эченә ала.
Ленар Гарипов шулай ук Идел буе агросәнәгать тармагының кадрлар киләчәген булдыру турында да сөйләде. “Күргәзмәдә студентлар стартаплары контекстында агросәнәгать комплексындагы фәнгә багышланган “Science Slam” форматына аерым игътибар биреләчәк. Бу яшь галимнәрнең үз фәнни тикшеренүләре турында кыска чыгышлары рәвешендәге фәнни коммуникациянең академик булмаган форматы”, - диде Ленар Гарипов.
Агросәнәгать комплексының кадрлар белән тәэмин ителешен арттыру “Азык-төлек иминлеген технологик тәэмин итү” илкүләм проектының “АПКда кадрлар” федераль проекты кысаларында гамәлгә ашырыла.
«Казан Агро - 2026» күргәзмәсе директоры Гүзәл Исхакова күргәзмәнең яңа бүлеге - «Агротуризм» турында сөйләде. Анда туристлык проектлары аша авыл ялына һәм фермер хуҗалыкларын үстерү мөмкинлекләренә кызыксынуның артуы чагылдырыла.
Күргәзмә кысаларында 12 февральдә төп чара — Татарстан Республикасы Авыл хуҗалыгы һәм азык-төлек министрлыгының йомгаклау коллегиясенең киңәйтелгән утырышы узачак, анда төбәкнең бер еллык авыл хуҗалыгы эшләренә йомгаклар ясалачак һәм тармакны алга таба үстерүнең өстенлекле юнәлешләре билгеләнәчәк.
«Казан Агро - 2026» күргәзмәсе - базарның төп трендлары турында белү, алдынгы технологияләр һәм продукция белән танышу, шулай ук яңа сезонга отышлы контрактлар төзергә яңа партнерлар табу өчен килүчеләргә уникаль мөмкинлек.