Марат Җәббаров: “Актаныш районы өчен авыл хуҗалыгы продукциясе җитештерү төп юнәлеш булып тора”
Бүген Татарстан Республикасы Премьер-министры урынбасары - Татарстан Республикасы авыл хуҗалыгы һәм азык-төлек министры Марат Җәббаров эш сәфәре белән Татарстан Республикасы Актаныш муниципаль районында булды. Аны район башлыгы Ленар Зарипов озата йөрде.
«Яшьлек» яшьләр үзәгендә Марат Җәббаров трактор техникасы күргәзмәсе белән танышты. Актаныш технология техникумы студентлары «XXI гасыр Кулибины» тракторын һәвәскәр ясаучыларның күргәзмә-конкурсында үз эшләнмәләрен күрсәттеләр. "Балаларның иҗатын күрү бик сөендерә, киләчәктә алар югары квалификацияле инженерлар булырлар һәм җәмгыятьтә үзләренең лаеклы урыннарын табарлар, дип уйлыйм һәм безнең бурыч - аларга мондый башлангычларда ярдәм итү", - диде министр.
Аннары Марат Җаббаров Татарстан Республикасы Актаныш муниципаль районы Советының “2025 елда Татарстан Республикасы Актаныш муниципаль районының социаль-икътисадый үсеш йомгаклары һәм 2026 елга бурычлар турында” хисап утырышында катнашты. Утырыш барышында районның төп эш күрсәткечләре, ирешелгән нәтиҗәләр һәм алга таба үсешнең өстенлекле юнәлешләре каралды.
Министр, Татарстан үзенең тотрыклы социаль-икътисадый үсешен дәвам итә, дип билгеләп үтте. Төп күрсәткечләр буенча республика Идел буе федераль округында ышанычлы рәвештә беренче урынны һәм тулаем ил буенча алдынгы урыннарны били.
Республика шулай ук, гадәттәгечә, аграр тармакта алдынгы урыннарны били. Авыл хуҗалыгы продукциясе күләме беренче мәртәбә 400 млрд сумнан артып китте, әлеге күрсәткеч буенча республика Россия Федерациясе субъектлары арасында лидерлар бишлегендә.
2025 ел йомгаклары буенча Актаныш районы агросәнәгать комплексы рейтингында 15нче урында. Район игенчеләре, 151 мең тонна бөртекле һәм кузаклы культуралар, 33 мең тонна майлы культуралар суктырып, тармакның уңышына үзләреннән зур өлеш керттеләр.
.jpg)
«Актаныш районы өчен авыл хуҗалыгы продукциясе җитештерү төп юнәлеш булып тора. Районның агросәнәгать комплексы буенча тулаем продукция җитештерү күләме 6,1%ка арткан», - дип өстәде Марат Җәббаров.
Марат Җәббаров шулай ук кадрлар әзерләүгә һәм аларны авыл хуҗалыгына җәлеп итүгә зур игътибар бирергә өндәде. «Узган ел «Азык-төлек иминлеген технологик тәэмин итү» илкүләм проектының «АПКда кадрлар» федераль проекты эшли башлады. Федераль проект адымнарының берсе - авыл мәктәпләрендә агротехнология классларын яңарту. Бу табигый-фәнни һәм төгәл фәннәр буенча тирәнәйтелгән программа буенча һөнәри юнәлешле белем бирүнең яңа, заманча моделен кертергә мөмкинлек бирәчәк. Төп принцип - мәктәпләрнең, көллиятләрнең, югары уку йортларының һәм булачак эш бирүчеләрнең үзара тыгыз хезмәттәшлеге. Дәүләт, инвесторга чыгымнарның 90%ын кайтарып, инициативаны гамәлгә ашыруга ярдәм итә”, - дип ассызыклады министр.
Ленар Зарипов 2025 елга төп йомгакларны ясады һәм авыл хуҗалыгының район икътисады нигезе булуын билгеләп үтте: тулаем продукция 8,6 млрд сумлык җитештерелгән; сөт 86 576 тонна җитештерелгән; бер сыердан савым 8 264 кг булган; тармакта 1 605 кеше эшли; 485 млн сумга техника һәм җайланмалар сатып алынган.
Чара азагында Марат Җәббаров хезмәткәрләргә күпьеллык намуслы хезмәтләре, югары һөнәри осталыклары һәм вазыйфаи бурычларын төгәл башкарулары өчен дәүләт бүләкләре тапшырды.