Татарстан Республикасы агросәнәгать комплексын цифрлаштыру буенча лидер булып тора
Бүген Россия Федерациясе Авыл хуҗалыгы министрлыгында агросәнәгать комплексы өлкәсен цифрлы трансформацияләүнең динамик рейтингын оештыру йомгаклары буенча видео-конференц-элемтә форматында киңәшмә узды. Анда Татарстан Республикасы авыл хуҗалыгы һәм азык-төлек министрының беренче урынбасары Ленар Гарипов катнашты.
Агросәнәгать комплексын цифрлаштыру буенча Татарстан Республикасы лидер булып тора. Лидерлар бишлегенә шулай ук Ямал-Ненец АО, Пенза, Ленинград һәм Кострома өлкәләре керә.
Россиядә авыл хуҗалыгын цифрлаштыру - ул инде перспектива гына түгел, ә глобаль чакырулар фонында уңышны арттырырга, чыгымнарны киметергә һәм үзебезнең агросәнәгать комплексының позицияләрен ныгытырга ярдәм итә торган чынбарлык.
Татарстан Республикасы авыл хуҗалыгының төрле тармакларында кулланыла торган цифрлы чишелешләр: үсемлекчелек өлкәсендә - геомәгълүмат һәм метеомониторинг системалары һәм спутник мониторингы; терлекчелектә терлекләрне карау һәм ашату системалары, терлекләрнең цифрлы паспорты, регламентларны мониторинглау һәм тикшереп тору системалары, саву аппаратлары актив гамәлгә кертелә; эшкәртү тармагында автоматлаштырылган линияләр һәм ясалма интеллект белән системалар кулланыла.
“Татарстанда авыл хуҗалыгын цифрлаштыру - ул тренд кына түгел, ә тармакның нәтиҗәлелеген һәм конкурентлык сәләтен үстерүгә ярдәм итә торган төп фактор. Татарстан Республикасы цифрлы технологияләрне гамәлгә кертү буенча максатчан тырышулар нәтиҗәсендә Россия төбәкләре арасында агросәнәгать комплексын цифрлаштыруның динамик рейтингында ышанычлы рәвештә беренче урынны алып тора, һәм ул моны 2023 елда һәм 2024 елның беренче өч кварталында югары күрсәткечләр белән раслый”, - дип билгеләп үтте Ленар Гарипов.
«Цифрлы икътисад» илкүләм проекты кысаларында икътисадта, социаль өлкәдә һәм авыл хуҗалыгында цифрлы технологияләрне тизрәк гамәлгә кертү югары технологияле бизнес өчен шартлар тудырачак, глобаль базарда илнең конкурентлык сәләтлелеген арттырачак һәм илкүләм иминлекне ныгытачак.