Министрлыкта АПК ветеранын котладылар
Бүген Татарстан Республикасы Авыл хуҗалыгы һәм азык-төлек министрлыгында агросәнәгать комплексының мактаулы ветераны, «Татарстан Республикасының атказанган зоотехнигы» Әлхать Вәлиевны котладылар.
Әлхать Вәлиев бүген үзенең 75 яшьлек юбилеен билгеләп үтте. Ул эшкә намуслы караш, көндәлек тырышлык белән югары максатларга ирешеп булуны исбатлаган кеше. Ул җитештерү процессын нәтиҗәле оештыруга һәм үзебезнең кошчылыкның иң яхшы традицияләрен саклап калуга зур өлеш кертте. Эшләгән елларда ул үзен оста оештыручы, компетентлы, хезмәттәшләренә карата игътибарлы, үзенә дә, башкаларга да таләпчән булуын күрсәтте, аңа хас булган бу сыйфатлар белән ул абруй, хөрмәт казанды.
Әлхать Вәлиев республиканың кошчылык фабрикаларын үстерүгә, селекция-нәсел эшен камилләштерүгә, кош-кортларны тоту һәм ашату технологияләренә, йомырка һәм кош ите җитештерүгә зур өлеш кертте. «Бөгелмә» йомырка тавыкларының өч линияле аутосекс кроссын булдыруда да актив катнашты, ул югары күрсәткечләр бирде һәм Татарстан Республикасында киң таралыш алды.
Авыл хуҗалыгын үстерүгә керткән зур өлеше, күпьеллык намуслы һәм нәтиҗәле хезмәте өчен Әлхать Вәлиевка «Татарстан Республикасы агросәнәгать комплексының мактаулы ветераны» күкрәк билгесе тапшырылды.
Аны Татарстан Республикасы Премьер-министры урынбасары - Татарстан Республикасы авыл хуҗалыгы һәм азык-төлек министры Марат Җәббаров исеменнән министр урынбасары Гөлүс Баязитов котлады һәм юбилярга Рәхмәт хаты тапшырды.
Шулай ук Татарстан Республикасы агросәнәгать комплексының Ветераннар советы рәисе Марс Алиев ветеранга АПК Ветераннар советының Котлау хатын тапшырды.