«АВГУСТ-АГРО» беренче тапкыр Һиндстанга ашлык җибәрде
«Август-Агро» компаниясе Һиндстанга мең тонна борчак экспортлады.
Продукциягә “Август-Теләче” агрофирмасы складыннан Калькутта һәм Нхава-Шева портларына кадәр катлаулы логистик маршрут үтәргә туры киләчәк. Продукция контейнерларда бара: Теләчедән Новороссийск портына кадәр автотранспортта, ә аннан соң Һинд океаны буенча диңгез юлы белән барачак. Йөк, кайсы портка кайчан килеп җитүенә карап, 1,5-2 ай эчендә барып җитәчәк.
“Август-Агро” халыкара алыш-бирешне беренче тапкыр сатып алучы белән турыдан-туры гамәлгә ашыра. Катлаулы логистикага һәм күп чыгымнар тотылуга карамастан, контракт компания өчен отышлы”, - дип билгеләп үтте “Август-Агро” ИКнең коммерция бүлеге башлыгы Әмир Галәүтдинов.
Элегрәк, 2023 елның көзендә, “Август-Агро” компаниясе арадашчы-экспортер аша су юлы буйлап Төркиягә 4 мең тонна борчак партиясе җибәргән иде.