Район хәбәрләре: Арча районы 2020 елда 5 мең тоннадан артык ит һәм 65 мең тоннадан артык сөт җитештерүне планлаштыра
21 гыйнварда Арча районында терлекчелек тармагының 2019 елгы эшенә йомгаклар ясадылар. Чарада Арча районы башлыгы Илшат Нуриев, Татарстан Республикасы Авыл хуҗалыгы һәм азык-төлек министрлыгының Арча районы Авыл хуҗалыгы һәм азык-төлек идарәсе башлыгы Ренат Гатиятов, Идарәнең терлекчелек бүлеге консультанты Роберт Хәйретдинов, район Авыл хуҗалыгы һәм азык-төлек идарәсенең селекция-нәсел инспекциясе хезмәте башлыгы Зәмхәрия Зарифуллина, район ветеринария берләшмәсе җитәкчесе Ринат Фәйзрахманов, агрофирмаларның, район хуҗалыкларының терлекчелек буенча белгечләре, җитәкчеләре катнашты.
Идарәнең терлекчелек бүлеге консультанты Роберт Хәйретдинов хәбәр итүенчә, авыл хуҗалыгы оешмалары тарафыннан 2019 елның 12 аенда 5053,3 тонна ит, (2018 елга карата 106 %) һәм 61916,5 тонна сөт (105%) җитештерелгән. Декабрьдә сөт күләме 114%ка җиткән, тулаем савым – 5252,2 тонна. Эре мөгезле терлекләр саны - 37,1 мең баштан артык. 13215 баш бозау туган. Ул үз чыгышында терлекләрнең баш санын саклап калуга һәм сыерларның баш санын арттыруга игътибар бирде.
Авыл хуҗалыгы һәм азык-төлек идарәсенең селекция-нәсел инспекциясе хезмәте башлыгы Зәмхәрия Зарифуллина 2019 елда терлекләр үрчетүгә йомгаклар ясады. Һәр хуҗалык буенча башмак таналар кайтаруга җентекле анализ ясалды. 2020 елның 9 аенда башмак таналардан бозаулар тууга исәп-хисаплар ясалды. «Сыерларның физиологик торышы сыерлар буенча мөһим күрсәткеч, ул белгечләргә үз эшләрен планлаштырырга ярдәм итә», - дип билгеләп үтте белгеч.
Район ветеринария берләшмәсе җитәкчесе Ринат Фәйзрахманов катнашучыларны терлек азыгы анализлары һәм терлекләр каны биохимиясе нәтиҗәләре белән таныштырды. Ул хуҗалыкларга рационнар төзегәндә бу күрсәткечләргә игътибар итәргә тәкъдим итте.
Киңәшмә азагында Авыл хуҗалыгы һәм азык-төлек идарәсе башлыгы Ренат Гатиятов һәр хуҗалыкның эшендәге кимчелекләрне күрсәтте һәм 2020 елга бурычлар билгеләде:
- сыерларның баш санын кимендә 2%ка арттырырга (38000 башка җиткерергә);
- 1 сыердан савымны 5913 кг-га җиткерергә;
- бозаулар тууны 13875 башка җиткерергә;
- сөт җитештерүне 65012 тоннага җиткерергә;
- ит җитештерүне 5157 тоннага җиткерергә;
- тәүлеклек артымны 785 граммга җиткерергә.
Шулай ук терлекчелек тармагының 2019 елның декабрь аендагы эшенә йомгаклар буенча “Кырлай” АФ” ҖЧҖ хуҗалыгына күчмә кубок һәм район башлыгы дипломы тапшырылды.
Моннан тыш, терлекчелек тармагының 2019 елгы эшенә йомгаклар буенча бүләкләр «Ашыт» ҖЧҖенә, «Курса МТС» ҖЧҖенә һәм «Тукай» ҖЧҖенә бирелде.