Татарстан аграрийларына гектарга кимендә 70 кг минераль ашлама тупларга кирәк булачак
Татарстан Республикасы Авыл хуҗалыгы һәм азык-төлек министрлыгы Татарстан авыл хуҗалыгы җитештерүчеләренә 2020 ел уңышы өчен бер гектарга кимендә 70 кг минераль ашлама тупларга тәкъдим итә.
Татарстан Республикасы авыл хуҗалыгы һәм азык-төлек министры урынбасары Илдус Габдрахманов әйтеп узганча, республикада бу елга чәчүлек мәйданы 2,8 млн га тәшкил итә. 2020 елның 1 гыйнварына минераль ашламалар 46,1 мең тоннадан артыграк сатып алынган.
«Бу бер гектарга 16,5 кг, ягъни фаразга акарата 23,5% тәшкил итә. узган елның 1 гыйнварына минераль ашламалар бер гектарга 15,2 кг тупланган иде, бу елның күрсәткече 1,3 кг-га күбрәк», – дип төгәлләштерде министр урынбасары.
Ел башына иң күп минераль ашламалар Зәй муниципаль районында туплаган – бер гектарга 46,6 кг (фаразга карата 66,6%). Лидерлар өчлегендә шулай ук Тәтеш районы – 44 кг (62,8%) һәм Сарман районы – 40,1 кг (57,3%).
«Шунысы мөһим, минераль ашламалар туплау темплары бу һәм башка муниципаль районнарда узган сезонга караганда югарырак», – диде Илдус Габдрахманов.
Бу елның 1 гыйнварына Түбән Кама районында минераль ашламалар туплау буенча фараз күрсәткече 48,4%ка үтәлгән, Саба районында – 46,6%ка, Кукмара районында – 41,1%ка, Азнакай районында – 40,2%ка (республика буенча уртача күрсәткеч - 23,5%).
Татарстан Республикасы Авыл хуҗалыгы һәм азык-төлек министрлыгы мәгълүматы буенча, минераль ашламалар туплау буенча иң түбән күрсәткечләр Әгерҗе, Кама Тамагы, Лаеш, Апас, Яңа Чишмә, Кайбыч, Лениногорск, Питрәч, Алабуга районнарында, аларда фараз күрсәткечләре 10%тан да кимрәккә үтәлгән.
Элегрәк хәбәр ителгәнчә, 2020 елда республикада үсемлекчелек продукциясен җитештерү күләмен 10%ка арттыру бурычы куелды.