Казан дәүләт аграр университеты уку процессын цифрлаштыруны арттыра
Агрономия факультетының 100 еллык юбилее уңаеннан Казан дәүләт аграр университетында уку процессында цифрлы технологияләрне нәтиҗәлерәк куллануны тәэмин итә торган яңа класс ачылды. Аудиторияне файдалануга кертү актын имзалуда һәм шуннан соң агрономия белемен бүгенге үсемлекчелектә куллануның роле турындагы түгәрәк өстәлдә Татарстан Республикасы авыл хуҗалыгы һәм азык-төлек министры урынбасары Илдус Габдрахманов катнашты.
Авыл хуҗалыгының югары үсеше республикага халыкны үзебездә җитештерелгән барлык төр авыл хуҗалыгы продуктлары белән тәэмин итәргә мөмикнлек бирә. Татарстан Республикасы авыл хуҗалыгы һәм азык-төлек министры урынбасары Илдус Габдрахманов үз чыгышында билгеләп үтүенчә, бүгенге шартларда авыл хуҗалыгы җитештерүенең икътисадый һәм энергетик нәтиҗәлелеген алга таба арттыруны үсемлекләрне яклау өлкәсендәге яңа казанышларны практикада кулланмыйча күз алдына китереп булмый.
«Корткычларның, чүп үләннәрнең популяциясе, шулай ук аларга каршы көрәш чараларына яраклаша торган яңа зарарлы микроорганизмнарның барлыкка килүе хәлләрне катлауландыра. Шуңа күрә дә яңа буын агрономнарын үсемлекчелек тармагында бик тиз үз урынын таба торган алдынгы технологияләргә өйрәтү аеруча мөһим. Казан дәүләт аграр университетының үсемлекләрне яклау чараларын җитештерү буенча дөньякүләм лидерларның берсе белән хезмәттәшлек итүе белем алу практикасын алга таба үстерү һәм яшь белгечләр әзерләү ысулларын интенсификацияләү өчен нигез булып торачак», – дип, йомгак ясады ул.
Bayer компаниясенең клиент маркетингы бүлеге җитәкчесе Виктор Борисенко авыл хуҗалыгы өлкәсендә белгечләр әзерләү өчен әйдәүче аграр югары уку йортлары белән көчләрне берләштерүгә кызыксынуны болай дип аңлатты: «Тиешле дәрәҗәдә һөнәри әзерлек булмый торып, тармакны технологик үзгәртүгә ирешеп булмый. Инновацион компания буларак, Bayer үсемлекчелектәге бүгенге казанышларны Россия базарына чыгаруга омтылу белән бергә, аларны нәтиҗәле һәм имин куллануга өйрәтүгә дә үз өлешен кертә. Шуңа күрә, мәгариф эшчәнлеге өлкәсендә КДАУ белән хезмәттәшлекне үстереп, безнең компания IT-аудитория проектын гамәлгә ашыруга зур энтузиазм белән кереште. Безнең уйлавыбызча, бу белем алуда яңа заманча ысулларны кулланырга һәм укучылар өчен үсемлекчелектә компетенцияне арттыруга яңа стимул бирәчәк».
23 октябрьдә ачылган класс заманча җайланмалар белән җиһазландырылган унбер уку урыныннан гыйбарәт. Бу җайланмаларга компьютерлар, интерактив такта һәм проектор, шулай ук уку материаллары керә.
«Аграр секторда яңа укыту ысуллары куллануның тармактагы технологик үсешкә туры килүе бүген аеруча мөһим. Россиядә җитештерелә торган авыл хуҗалыгы продукциясенең яртысыннан артыгы туры килә торган үсемлекчелек өлкәсе цифрлы технологияләр үсешендәге трансформацияләрнең ачык үрнәге булып тора. Республиканың үсемлекчелек тармагы өчен кадрлар әзерләү үзәге булып торучы Казан дәүләт аграр университетында белем бирү безнең студентларның киләчәккә ышанычларына, аларның омтылышлары һәм талантлары хезмәт базарында лаеклы бәя алуга корылган булу белән без горурланабыз », – диде ректор Айрат Вәлиев.