Марат Әхмәтов: «5 сентябрьдәге ярминкәләрдә азык-төлек продуктлары Татарстан Республикасы Авыл хуҗалыгы һәм азык-төлек министрлыгы тәкъдим иткән бәяләрдән сатылды»
Бүген Татарстан Республикасы Министрлар Кабинетында авыл хуҗалыгы ярминкәләрен оештыру мәсьәләләре буенча Татарстан Республикасы Премьер-министры урынбасары – Татарстан Республикасы авыл хуҗалыгы һәм азык-төлек министры Марат Әхмәтов катнашында брифинг булды.
«2014 елның көзге - 2015 елның язгы чорларында 34 ярминкә оештырылды, 1,3 млрд. сумлык продукция сатылды», - дип хәбәр итте Марат Әхмәтов.
Министр искә төшереп үткәнчә, быелгы көзге ярминкәләр узган атнада, 5 сентябрьдә башланып китте. Ярминкәләрдә азык-төлек продуктлары Татарстан Республикасы Авыл хуҗалыгы һәм азык-төлек министрлыгы тәкъдим иткән бәяләрдән сатылды. Авыллар алга таба да үз продукцияләрен һәр атнаның шимбәсендә Казанның 8 мәйданчыгында һәм Чаллының 2 мәйданчыгында сатачаклар. Моннан тыш,Зеленодольск муниципаль районының Октябрьск поселогында «Яңа Тура» технополисы территориясендә яңа авыл хуҗалыгы ярминкәсе эшли башлады.
«Ярминкәләр 26 декабрьгә кадәр булачак», - дип хәбәр итте Татарстан Республикасы Авыл хуҗалыгы һәм азык-төлек министрлыгы башлыгы.
«Ярминкәләр - бизнес түгел, ә социаль проект ул, һәм без, үзебезнең яктан, авылларыбызга ярдәм итәргә тырышабыз», - диде Марат Әхмәтов.
Мәсәлән, Татарстан Республикасы Президенты вазыйфаларын вакытлыча башкаручы Рөстәм Миңнеханов белән килештереп, авыл хуҗалыгы товар җитештерүчеләренә ягулык-майлау материаллары буенча транспорт чыгымнары компенсацияләнә.
Идел буе федераль округында безнең республика азык-төлек продуктларының арзанлыгы буенча лидерлыкны саклый әле: каймак буенча - 1 нче урында, бодай оны - 3 нче урында, ак май, пастеризацияләнгән, майлылыгы 2,5 — 3,2%лы сөт һәм каты сырлар буенча 4 нче урында.
Икмәк пешерү предприятиеләрен фонд оны белән тәэмин итү һәм ипинең социаль төрләренә («Сельский», «Дарницкий», «1 сортлы ак ипи») бәяләр үсешен саклап калу өчен Татарстан Республикасының Төбәк азык-төлек фондына 194,2 мең тонна азык-төлек ашлыгы әзерләнде.
Бүгенге көнгә республикада бөртекле культуралар 1,5 млн. гектарга якын мәйданда суктырылган, бу гомуми мәйданның 92%ын тәшкил итә. 3,1 млн. тонна ашлык җыелган, уртача уңыш 21,3 ц/га тәшкил итә.
Брифинг азагында Марат Әхмәтов журналистларның күпсанлы сорауларына җавап бирде.