Татарстан Республикасы авыл хуҗалыгы һәм азык-төлек министры Марат Әхмәтовның Яңа ел белән котлавы

Кадерле агросәнәгать комплексы   хезмәтчәннәре һәм  ветераннары!  

Татарстан Республикасы Авыл хуҗалыгы һәм азык-төлек министрлыгы исеменнән һәм шәхсән үзем сезне якынлашып килүче Яңа ел белән чын күңелдән котлыйм! 

Һәр Яңа ел алдыннан без узып баручы елга йомгак ясыйбыз. 2014 ел безнең тармак өчен табигатьнең көйсезлеге аркасында  катлаулырак ел булды. Без быел артык зур уңышларга ирешә алмадык. Әмма авыл хуҗалыгы хезмәтчәннәре игенчелектә һәм терлекчелектә югары күрсәткечләргә ирешү өчен барысын да эшләделәр.  Татарстанның агросәнәгать комплексы  республика халкын төп азык-төлек продуктлары белән тулысынча тәэмин итә ала. Бүгенге  санкцияләр һәм азык-төлек импортлауны чикләү шартларында бу аеруча мөһим. Җитештерү, икътисадый, финанс күрсәткечләре узган ел белән чагыштырганда югарырак. Тулаем җыелган ашлык 3 млн. 650 мең  тонна тәшкил итә. Сөт һәм ит тармакларында да күрсәткечләр былтыргыдан югары.  

Авыл кешесенә һәрвакыт сабырлык, тырышлык, хезмәт сөючәнлек   хас.  Нәкъ менә шушы сыйфатлар бәрабәренә аграрчылар, кыенлыкларга да карамастан, үз миссиясен намуслы үтәп килә.

Республикада авыл җирлекләрен үстерү, ныклы икътисадый база һәм заманча социаль  инфраструктура  булдыру өчен шактый күп эшләнә. Без алга таба да шәхси хуҗалыкларга һәм  крестьян-фермер хуҗалыкларына, югары технологияле гаилә фермаларын төзүгә  ярдәм  итү өчен  максатчан юнәлешле эш алып барачакбыз.  Бу авылны һәм авылның тормыш рәвешен саклап калырга,  авыл халкын эш белән һәм тотрыклы керем белән тәэмин итәргә ярдәм итәчәк.  

Авыл хуҗалыгы җитештерүен модернизацияләп, яңа технологияләрне үзләштереп, безнең   товар җитештерүчеләр үзләренең конкуренциягә сәләтлелеген арттыралар, азык-төлек базарында яңа үрләр яулыйлар. Нәкъ менә шуның аркасында Татарстан Россия Федерациясе төбәкләре арасында җитештерү күләмнәре буенча  лидерлар рәтендә. Бу – илне туендыручыларның – игенчеләрнең һәм терлекчеләрнең, авыл хуҗалыгы хезмәтчәннәренең –  югары һөнәри осталыклары,  тырышлыгы һәм һәркөн башкара торган фидакарь хезмәт нәтиҗәсе.  

Кадерле дуслар!

Сезне ихластан Яңа ел белән котлыйм! Сезгә нык сәламәтлек,  гаиләләрегездә иминлек, муллык телим! Һәр туар көн сезгә яңа бәхет-куанычлар алып килсен, башлаган эшләрегездә уңышлар юлдаш булсын! 

Татарстан Республикасы Премьер-министры урынбасары -

Татарстан Республикасы авыл хуҗалыгы һәм азык-төлек министры                                                              Марат Әхмәтов