Рөстәм Миңнеханов һәм Марат Җәббаров Бөгелмә районында чәчү эшләренең барышын бәяләделәр
Татарстан Рәисе Рөстәм Миңнеханов эш сәфәре белән Бөгелмә районында булды. Республика Рәисе язгы кыр эшләренең барышы белән танышты. Аның белән бергә Татарстан Республикасы Премьер-министры урынбасары - Татарстан Республикасы авыл хуҗалыгы һәм азык-төлек министры Марат Җәббаров һәм Бөгелмә районы башлыгы Дамир Фәттахов йөрделәр.
Хуҗалыклар җитәкчеләре һәм авыл җирлекләре башлыклары белән очрашуда кырлардагы хәл турында фикер алыштылар. Район башлыгы әйтүенчә, районда чәчү яхшы темплар белән бара. Барысы 43,7 мең га чәчү планлаштырылган, бүгенгә эшләр 14,3 мең га мәйданда башкарылган - бу 33%. Шулардан бөртекле сабан культуралары - 5,7 мең гектардан артык, көнбагыш - 4,8 мең гектар, майлы җитен - 3,5 мең гектардан артык. Шулай ук 180 гектарда техник киндер чәчелгән: аның тресты (саламы) төрле тармакларда, аерым алганда, материаллар җитештергәндә кулланыла.
Бүген кыр эшләренә 220 кеше һәм 150 берәмлек техника җәлеп ителгән. Районда һәркөнне 2 мең гектардан артык чәчү чәчелә. Һава шартлары уңай торса, язгы чәчүне 20 майга тәмамлау планлаштырыла.
Республика Рәисенә хәбәр итүләренчә, 2026 ел уңышы өчен 7 мең 193 га көзге культуралар чәчелгән. Дым каплату һәм күпьеллык үләннәрне тукландыру эшләре дәвам итә. Бүгенгә бер гектарга 48 кг ашлама тупланган, бу эш дәвам итә - бер гектарга 80 кг-га җиткерү планлаштырыла.
Терлекчелек өлкәсенә килгәндә, районда 11 мең баш мөгезле эре терлек исәпләнә, шул исәптән 4,6 мең баш сыер, шулай ук 551 меңнән артык кош-корт. Сөт җитештерү 2%ка арткан - тәүлеклек савым 134 тонна. Йомырка җитештерү узган ел дәрәҗәсендә - бүген ул 25,6 млн данәдән артык. Хуҗалыкларда азык җитәрлек әзерләнгән.
Татарстан Республикасы Авыл хуҗалыгы һәм азык-төлек министрлыгы башлыгы билгеләп үткәнчә, тулаем республика буенча чәчү 25% мәйданда чәчелгән, ашламалар кертелә. Бөгелмә районына килгәндә, бүген төп мәсьәлә - шәхси хуҗалыкларны үстерү. Районда шәхси ярдәмче хуҗалыкларда барлыгы 480 баш сыер исәпләнә, министр сүзләренә караганда, бүгенге көндә бу юнәлешкә ярдәм итүнең барлык мөмкин булган төрләре булдырылган һәм җирлек башлыкларына халык белән активрак эшләргә кушты.
Рөстәм Миңнеханов билгеләп үткәнчә, бүген иң мөһиме - язгы кыр эшләрен вакытында тәмамлау. Гомумән алганда, Республика Рәисе махсус хәрби операциядә катнашучыларның гаиләләренә, бигрәк тә һәлак булган сугышчыларның гаиләләренә ярдәм итүнең мөһимлеген ассызыклады. Ул районнарда тормыш сыйфатын яхшыртырга ярдәм итә торган барлык республика программаларының һичшиксез дәвам итәчәгенә ышандырды.
Очрашудан соң Рөстәм Миңнеханов җирле предприятиеләр җитештергән продукцияне: кош-корт итен, сөт һәм икмәк продукциясен карап чыкты.
Аннары Рөстәм Миңнеханов һәм Марат Җәббаров эш сәфәре барышында Бөгелмә районының Ефановка авылында элеватор комплексын ачу тантанасында катнаштылар.
Әлеге объект агросәнәгать комплексының экспорт инфраструктурасында мөһим звенога әвереләчәк. Тулы куәтенә эшли башлагач, элеватор ел саен чит илләргә 150 мең тоннадан артык бөртекле һәм майлы культуралар җибәрүне планлаштыра. Компания тәҗрибәсеннән күренгәнчә, Татарстанның көнбатышында эшли башлаган шундый ук комплекс узган ел йомгаклары буенча 223 мең тонна авыл хуҗалыгы продукциясе җибәргән.
Рөстәм Миңнеханов инвесторга республикада алып бара торган эшләре һәм Татарстанның агросәнәгать комплексына керткән өлеше өчен рәхмәт белдерде. “Соңгы елларда компания 10 районның агросәнәгать комплексын үстерүгә 38 млрд сумнан артык акча кертте. Нульдән заманча сөтчелек комплекслары, орлык заводы һәм логистик үзәкләр төзеде. Һәм, гомумән, авыл территорияләрен комплекслы үстерү проектларын гамәлгә ашыруда, шулай ук тармак хезмәткәрләренә һәм ветераннарына һәрдаим ярдәм итә”, - дип билгеләп үтте республика Рәисе.
Ул, проект республика авыл хуҗалыгы продукциясе күләмнәрен даими арттыруны тәэмин итү өчен өстәмә мөмкинлекләр ача, дип ассызыклады.
Элеваторда берьюлы 100 мең тонна ашлык сакларга мөмкин. Бу элеваторның үзенчәлеге - ашлык югары тизлек белән төяп озатыла: тәүлеккә 65 вагонга кадәр.