Ленар Гарипов XIV Бөтенроссия татар авыллары эшкуарлары җыенын ачуда катнашты
Казанда XIV Бөтенроссия татар авыллары эшкуарлары җыены эшли башланды. Ул 800дән артык катнашучыны җыйды, алар арасында кече бизнес, фермер хуҗалыклары, шәхси хуҗалыклар һәм дәүләт хакимияте органнары вәкилләре бар. Форум, гадәттәгечә, бизнесның социаль җаваплылыгы һәм татар дөньясының бердәмлеген ныгыту мәсьәләләренә аерым игътибар бирә.
Җыенны ачуда Татарстан Республикасы Авыл хуҗалыгы һәм азык-төлек министрының беренче урынбасары Ленар Гарипов катнашты. Ул республика агросәнәгать комплексының торышы, шулай ук кече хуҗалыкларга ярдәм чаралары турында сөйләде.
“Гомумән алганда, Татарстан Республикасында тулаем авыл хуҗалыгы продукциясен җитештерү күләмнәрендә кече хуҗалыкларның өлеше шактый зур, алар тарафыннан 2025 елда 160 млрд сумлык продукция яки барлык күләмнең 40%ы җитештерелгән. Республика авылларында миллионга якын кеше яши, аларның көндәлек хезмәте нәтиҗәсендә республика халкы төп азык-төлек продуктлары белән тулысынча тәэмин ителә”, - дип билгеләп үтте ул.
Ленар Гарипов, гамәлдәге ярдәм итү программаларына 2026 елдан эшләрен дәвам итүче кооперативларга республика бюджетыннан грант кертелә, дип ассызыклады. Татарстан Республикасы Рәисе карары белән 2030 елга кадәр сөт, ит, яшелчә продукциясен эшкәртүне үстерүгә ел саен 200 млн сум бүлеп биреләчәк. “Бу җитештерелә торган продукциянең өстәлгән бәясен үзебездә калдырырга һәм аны алга таба үсешкә, кооперативлар әгъзаларының — шәхси һәм фермер хуҗалыкларының керемнәрен арттыруга җибәрергә мөмкинлек бирәчәк”, - диде министрның беренче урынбасары.
Җыенда катнашучыларга мөрәҗәгать итеп, Ленар Гарипов: «Сезнең казанышлар, тәкъдимнәр һәм инициативалар безнең авылларыбызның киләчәге өчен нигез булачак», - дип билгеләп үтте.
Чара барышында Татарстан Республикасы Премьер-министры урынбасары — Бөтендөнья татар конгрессы Милли Шурасы Рәисе Васыйл Шәйхразиев шулай ук актив эшкуарларны татар халкы алдындагы казанышлары өчен бүләкләде.