Өч атнада узган язгы авыл хуҗалыгы ярминкәләрендә 283 млн сумлык продукция сатылган
Республикада 14 марттан гадәттәге авыл хуҗалыгы ярминкәләре эшли башлады, алар Казан шәһәрендә 14 мәйданчыкта, Чаллы һәм Зеленодольск районнарында 2шәр мәйданчыкта, Түбән Камада 3 мәйданчыкта һәм муниципаль районнарда төрле даимилектә уза.
Авыл хуҗалыгы ярминкәләре Татарстанда күркәм традициягә әверелде һәм, җитештерүчеләр белән кулланучылар арасында элемтәне ныгытып, авыл хуҗалыгын үстерүгә һәм төбәкнең азык-төлек иминлеген яхшыртуга ярдәм итеп, даими рәвештә уздырыла, бу «Нәтиҗәле һәм конкурентлы икътисад» илкүләм проекты максатларына һәм бурычларына туры килә.
Узган шимбәдә Казандагы ярминкә мәйданчыкларын Татарстан Республикасы авыл хуҗалыгы министрының беренче урынбасары Ленар Гарипов йөреп чыкты. Ул Батыршин һәм Ленинград урамнарындагы ярминкә мәйданчыкларында булды, продукциянең төрлелеген бәяләде, сатып алучылар һәм сатучылар белән аралашты.
Ярминкәләрдә, гадәттәгечә, фермерлар, кооперативлар һәм республика авыл хуҗалыгы предприятиеләре вәкилләре алып килгән натураль продуктларны отышлы бәяләрдән сатып алырга мөмкин.
Өч ярминкә атнасы йомгаклары буенча 282,7 млн. сумлык авыл хуҗалыгы продукциясе китерелгән; шулардан: 296,0 тонна яшелчә, шул исәптән 184,0 тонна бәрәңге; 55,2 тонна үлчәүле сөт; 78,3 тонна шикәр; 532,3 мең данә тавык йомыркасы; 301,5 тонна ит (шул исәптән 155,6 тонна сыер ите). Ярминкәләр үткәрү өчен 2 738 транспорт берәмлеге җәлеп ителгән.
Язгы авыл хуҗалыгы ярминкәләре 26 апрельгә кадәр дәвам итәчәк.