Татарстан умартачылары "Умартачылыкны үстерүнең нәтиҗәлелеген арттыру" программасын өйрәнделәр

2026 елның 6 марты, җомга

“Казан дәүләт аграр университеты” югары белем бирү ФДБМУендә “Умартачылыкны үстерүнең нәтиҗәлелеген арттыру” программасы буенча умартачылар квалификациясен күтәрү буенча укулар тәмамланды. 72 сәгатьлек укулар 2026 елның 24 февраленнән 6 мартына кадәр барды. Курсның модераторлары буларак, авыл хуҗалыгы фәннәре докторлары, профессорлар Валентин Шилов һәм Владимир Фомин дәресләр бирделәр.

Уку барышында Россия Федерациясендә һәм Татарстан Республикасында умартачылыкның бурычлары һәм аны үстерүнең төп юнәлешләре яктыртылды. Авыл хуҗалыгы һәм урман хуҗалыгы билгеләнешендәге җирләрдә умарталыклар оештыру өчен җир алу буенча адымлы инструкция бирелде, умарта күчләренең биологиясе каралды, умартачылыкны алып бару технологиясе яктыртылды, экологик чиста умартачылык продукциясен алу өчен заманча җайланмалар күрсәтелде, умарталарның йогышсыз һәм йогышлы авыруларын диагностикалау, дәвалау һәм профилактикалау чаралары каралды. Умартачылык продукциясен органик җитештерүне оештыруга аерым игътибар бирелде.

Дәресләрне уздыруда институт профессорлары, доцентлары, Татарстан Республикасы Авыл хуҗалыгы һәм азык-төлек министрлыгы, Татарстан Республикасы Урман хуҗалыгы министрлыгы, Министрлар Кабинетының Татарстан Республикасы буенча Баш ветеринария идарәсе, Россельхознадзорның Татарстан Республикасы идарәсе хезмәткәрләре, Авыл хуҗалыгы кооперациясенең компетенцияләр үзәге директоры, «Агросәнәгать комплексы продукциясенең иминлеген һәм сыйфатын бәяләү буенча федераль үзәк» ФДБУ вәкилләре, практик умартачылар һәм «Казан ДАУ» югары һөнәри белем бирү ФДБМУнең башка мөгаллимнәре катнашты.

Уку кысаларында бал фестивале узды, анда умартачылык продукциясе тәкъдим ителде һәм бал дегустациясе үткәрелде. Дегустация өчен республика умартачыларыннан 50дән артык бал үрнәге тәкъдим ителде. Шулай ук Кырым Республикасыннан һәм Башкортостан Республикасыннан баллар бар иде. Балның иң яхшы үрнәкләре җиңүчеләр дипломнары белән бәяләнде, калган умартачыларга бал фестивалендә катнашучыларның дипломнары бирелде. Эксперт комиссиясе Татарстан Республикасының Чүпрәле, Зеленодольск, Лаеш, Апас районнары һәм Кырым Республикасы умарталыкларында алынган балларны билгеләп үтте.

Укулар дистанцион белем бирү институты (ИДО) директоры Владимир Фомин, Татарстан Республикасы Авыл хуҗалыгы һәм азык-төлек министрлыгының терлекчелек тармакларын үстерү бүлеге башлыгы Сирень Нигъмәтҗанов, умартачылык һәм аквакультура секторы мөдире Рәмис Заһидуллин, «Агро-Апис-Бизнес» ҖЧҖ директоры һ.б.лар катнашында түгәрәк өстәл форматында йомгаклар ясау белән тәмамланды, алар умартачыларның барлык сорауларына төгәл җаваплар бирделәр.

Укулар тәмамлангач, тыңлаучылар квалификация күтәрү курсын узу турында таныклыклар алдылар.

Республика халкы арасында умартачылыкны популярлаштыру максатларында Татарстан Республикасы Авыл хуҗалыгы һәм азык-төлек министрлыгы белгечләре һәм умартачылар катнашында ел саен семинар-киңәшмәләр, бал ярминкәләре, төрле чаралар, съездлар үткәрелә, җирле журналларда һәм газеталарда мәкаләләр бастырып чыгарыла.