Марат Җәббаров Кукмара районында агротехнология классларын ачты
Бүген Татарстан Республикасы Премьер-министры урынбасары — Татарстан Республикасы авыл хуҗалыгы һәм азык-төлек министры Марат Җәббаров Татарстан Республикасы Кукмара муниципаль районында агротехнология классларын ачты. Аны район башлыгы Сергей Димитриев озата йөрде.
Кукмараның 3нче урта мәктәбендә Марат Җәббаров «Нәтиҗәле терлекчелек һәм заманча терлек азыклары» юнәлеше буенча агротехнология классы ачты. Анда дәресләр үткәрү өчен технологик җайланмалар, шул исәптән интерактив комплекслар һәм плакатлар, биология һәм зоология буенча микропрепаратлар комплектлары, лаборатория җайланмасы бар. Агроклассның инвесторы - «Урал» ҖЧҖ, анда 7 - 8нче сыйныфлардан 56 укучы белем алачак.
Марат Җәббаров, агротехнология классы укучыларын сәламләп, болай диде: “Сезгә шундый заманча класста уку бәхете тиде. Авыл хуҗалыгы өчен булачак кадрлар нәкъ менә биредә формалаша”.
Татарстан Республикасы Мәгариф һәм фән министры урынбасары Минзәлия Закирова билгеләп үткәнчә, укучылар Татарстан Республикасының иң яхшы мәктәпләренең берсендә иң сыйфатлы белем алалар. “Монда без укучыларыбызның һәм укытучыларыбызның иң зур җиңүләренә мисаллар ишеттек. Биредә агротехнологияләр өлкәсендә генә түгел, башка теләсә нинди тармак өчен киң мөмкинлекләр ачыла”, - диде ул.
Аннары Р.М. Зарипов ис. Яныль урта мәктәбендә Марат Җәббаров «Үз эшенең осталары» күргәзмәсендә булды һәм «Нәтиҗәле терлекчелек һәм заманча терлек азыклары» юнәлеше буенча шулай ук агротехнология классын ачты. Ул цифрлы микроскоплар, «Авыл хуҗалыгы хайваннарының кан әйләнеше системасы», «Авыл хуҗалыгы хайваннарының нерв системасы», «Авыл хуҗалыгы хайваннарының ашкайнату системасы» дигән яктыртылган стендлар белән җиһазландырылган. Биредә 7 һәм 10 сыйныф укучылары «Терлекчелек нигезләре», «Агрохимия», «Агрофизика», «Агроматематика» һәм «Заманча биотехнологияләр»не өйрәнәчәкләр. Бу классның инвесторы - «Вахитово» ҖЧҖ.
Аннары Ядегәр авылында министр агротехнология классын ачты һәм төрле юнәлешләр буенча лабораторияләрне карады.
Инвесторы «Восток» ҖЧҖ булган агротехнология классында да заманча технологик җайланмалар урнаштырылган: AirTouch интерактив панельләр, автоматлаштырылган гидропон стеллаж, аның эчендә фитоут һәм үсемлек тамырларын аэрацияләү көйләнгән, идарә итү механик таймер ярдәмендә башкарыла. Һәр стеллажда 12 автоном гидропон түтәл бар, бу параллель тәҗрибәләр үткәрергә мөмкинлек бирә һәм ул салат һәм яшелчә культуралары, тәмләткеч үләннәр, үсентеләр үстерү өчен каралган. Биредә 7 һәм 10 сыйныф укучылары профиль дәрәҗәдә химия, биология, физика, математика фәннәрен өйрәнәчәкләр, шулай ук агротехнология юнәлешендәге электив курслар узачаклар.
Сергей Димитриев, агротехнология классларында уку өчен барлык шартлар да тудырылган, бу укучыларның гына түгел, бөтен районның үсешенә яхшы этәргеч булачак, дип ассызыклады. “Без бергәләп алга барачакбыз һәм яңа җиңүләргә ирешәчәкбез”, - дип өстәде ул.
Агротехнология класслары «Азык-төлек иминлеген технологик тәэмин итү» илкүләм проектының «АПКда кадрлар» федераль проекты кысаларында ачылды. Быел Татарстан Республикасында 550 укучы 20 агротехнология классында белем алачак.