Марат Җәббаров Казан ярминкәләрендәге продукцияне бәяләде
Республикада көзге авыл хуҗалыгы ярминкәләре дәвам итә. Узган ялларда татарстанлылар Казанда, Чаллыда, Зеленодольскида, Түбән Камада һәм Кама Аланында оештырылган сәүдә мәйданчыкларында булдылар.
Аларда үз продукцияләрен республика районнары, агрохолдинглар һәм җирле фермерлар алып килеп саттылар.
Узган шимбәдә Казандагы ярминкә мәйданчыкларын Татарстан Республикасы Премьер-министры урынбасары — Татарстан Республикасы авыл хуҗалыгы һәм азык-төлек министры Марат Җәббаров карап чыкты. Ул сәүдә рәтләре буйлап йөреп, сатып алучылар һәм сатучылар белән аралашты.
Ярминкәләр югары социаль әһәмияткә ия һәм, җитештерүчеләр һәм кулланучылар арасында элемтәне тәэмин итеп, авыл хуҗалыгын үстерүгә һәм төбәкнең азык-төлек иминлеген яхшыртуга ярдәм итеп, республика җитештерүчеләре җитештергән авыл хуҗалыгы продукциясен сатуның иң кирәкле форматларының берсе булып тора, бу «Нәтиҗәле һәм конкурентлы икътисад» илкүләм проектының максатларына һәм бурычларына туры килә.
Шәһәр халкына арзанрак бәядән төрле продуктлар тәкъдим ителә: кош ите, йомырка, сыер ите, дуңгыз ите, бәрәңге, яшелчә, сөт һәм сөт продуктлары, шикәр, көнбагыш мае, он, кондитер әйберләре.
Тугыз ярминкә атнасы йомгаклары буенча 884,9 млн. сумлык авыл хуҗалыгы продукциясе сатылган; шулардан 5 704,5 тонна яшелчә: шул исәптән 3 562,3 тонна бәрәңге; 180,9 тонна үлчәүле сөт; 577,8 тонна шикәр; 1 209,3 мең данә тавык йомыркасы; 646,6 тонна ит ( шул исәптән 381,5 тонна сыер ите).
Ярминкәләр уздыру өчен 9 482 транспорт берәмлеге җәлеп ителгән.