Татарстан Республикасы «Алтын көз-2025» күргәзмәсендә зур экспозиция белән катнаша
Мәскәүнең Тимирязев Үзәгендә авыл хуҗалыгы өлкәсендә төп эшлекле вакыйга - 27нче «Алтын көз» Россия агросәнәгать күргәзмәсе ачылды.
Россия Федерациясе авыл хуҗалыгы министры Оксана Лут Татарстан Республикасы экспозициясендә булды. Татарстан Республикасы Премьер-министры урынбасары — Татарстан Республикасы авыл хуҗалыгы һәм азык-төлек министры Марат Җәббаров, стендны күрсәтеп, тармакның куәте, югары үсеш культурасы һәм республикада агросәнәгать комплексын цифрлы трансформацияләү турында сөйләде.
Татарстан Республикасы стендында дүрт көн дәвамында ит продукциясе, казылык эшләнмәләре, эшкәртелгән майлы культуралар продукциясе (май, майонез, джем), сөт продукциясе, сырлар, атланмай һәм кош ите эшләнмәләре белән таныша алачаклар. Россиядә иң эре аракы җитештерүче «Татспиртпром» АҖнең алкоголь продукциясе аерым тәкъдим ителәчәк.
Мәрсин һәм сөләйман балыкларының уылдыгын, шулай ук диңгез продуктларыннан консервларны эксклюзив дегустацияләү гурманнар өчен күңелле сюрприз булачак. Виноградның караңгы сортларыннан «Эмиз» натураль эчемлеге һәм шикәрсез «BAZR» лимонадлары килүчеләргә табигый тәм һәм аның файдасы белән ләззәтләндерәчәк. “Фермер утравы” фермер хуҗалыклары һәм кооперативлары продукциясен тәкъдим итәчәк: чәкчәк, деликатеслар, үрдәк һәм ат итеннән казылыклар, кымыз, сырлар һәм башкалар булачак. «Чистополье» агрохолдингы продукциянең киң ассортиментын тәкъдим итә: сыер һәм күркә итеннән ясалган казылык эшләнмәләре, күркә ите, яшелчәләр, бөртекле һәм майлы культуралар, катнаш азык, шулай ук фри бәрәңгесе була.
АПК өчен цифрлы чишелешләргә аерым игътибар биреләчәк: авыл хуҗалыгының нәтиҗәлелеген һәм тотрыклылыгын арттыруга омтылуны күрсәтеп, сыерларның аксавын контрольдә тоту, сөтне исәпкә алу системалары, АПКның дәүләт мәгълүмат системасы, VR-симуляторлар һәм метеомониторинг челтәре игътибарны җәлеп итәчәк.