Оксана Лут Казан дәүләт аграр университетының уникаль фәнни һәм белем бирү инициативаларын югары бәяләде
Россия Федерациясе авыл хуҗалыгы министры Оксана Лут Казан дәүләт аграр университетының Агробиотехнопаркында 2нче көн уза торган «Русское поле» киң күләмле тармак форумында булды. Аның белән бергә Татарстан Республикасы Премьер-министры урынбасары — Татарстан Республикасы авыл хуҗалыгы һәм азык-төлек министры Марат Җәббаров йөрде. Экскурсия программасын Казан ДАУ ректоры вазыйфаларын вакытлыча башкаручы Илшат Нуриев үткәрде.
Эшлекле сәфәр вакытында министр университетның булачак авыл хуҗалыгы белгечләренә белем бирүдә яңа алымнар кертүче агрокласслар җитәкчеләре һәм укучылар белән шәхсән аралашты. Оксана Лут «Форт-диалог» компаниясенең заманча җайланмалары белән җиһазландырылган агротехнологик класслар эше турындагы нотыкны игътибар белән тыңлады.
Министр студентларның һәм аспирантларның стартаплары, шулай ук Казан дәүләт аграр университеты галимнәренең үз эшләнмәләребезнең потенциалын күрсәтүче фәнни казанышлары белән кызыксынды. Ул авыл хуҗалыгын үстерүдә өстенлекле юнәлешләрнең берсе буларак карабодайның әһәмиятен ассызыклады, аны җитештерүнең үсеш перспективаларын билгеләп үтте.
АгроНТРИ - 2025 конкурсында җиңүчеләр белән очрашу тантаналы мизгел булды: Оксана Лут, талантлы студентларны һәм тикшеренүчеләрне хуплап, алар белән фотога төште. Студентларны агросәнәгать комплексында фәнни эшчәнлеккә җәлеп итү "Азык-төлек иминлеген технологик тәэмин итү" илкүләм проектының «АПКда кадрлар» федераль проекты максатларына һәм бурычларына туры килә.
Оксана Лут шулай ук авыл хуҗалыгы продукциясе һәм техникасы җитештерүче «Щелково-Агрохим», «RUSEED», «АгроТерра» кебек компанияләренең һәм форумда катнашучы башка компанияләрнең күргәзмә экспозициясен карады. Агробиотехнопарк территориясендәге чәчү материалларының һәм тәҗрибә кырларының үрнәкләре аеруча игътибар үзәгендә булды.
Очрашу нәтиҗәләре илнең авыл хуҗалыгы өчен профессионаллар әзерләү мәсьәләләрендә дәүләт белән университетларның үзара хезмәттәшлеге югары дәрәҗәдә булуын раслады. Мондый эшлекле очрашулар аграр сектор үсешенә булыша һәм киләчәктә үзебезнең агросәнәгать комплексында тотрыклы кадрлар ресурсларын булдыруга ярдәм итә.