Чистай районында бәрәңге эшкәртү буенча яңа завод ачылды
Бүген Россия Федерациясе авыл хуҗалыгы министры Оксана Лут, Татарстан Рәисе Рөстәм Миңнеханов һәм Татарстан Республикасы Премьер-министры урынбасары - Татарстан Республикасы авыл хуҗалыгы һәм азык-төлек министры Марат Җәббаров Чистай муниципаль районында һәм монда урнашкан «Чистополье» холдинг компаниясе» АҖнең җитештерү оешмаларында булдылар.
Искәртеп узабыз, Россия Федерациясе авыл хуҗалыгы министры Оксана Лут Татарстанга эшлекле сәфәр белән килде.
Беренче объект Александровка авылында «Чисто фри» ҖЧҖендә бәрәңге саклагыч булды.
Яшелчәләр өчен саклагычлар заманча технологияләр кулланып төзелгән һәм саклана торган продукция күләмен сизелерлек арттырырга гына түгел, ә аны саклау өчен оптималь шартлар тудырырга да мөмкинлек бирә. Монда шулай ук сортларга аеру цехы файдалануга тапшырылган. Планда - яшелчәләрне саклау куәтләрен алга таба арттыру.
Аннары Татарстан Рәисе һәм Россия Федерациясе Авыл хуҗалыгы министрлыгы башлыгы Александровка авылында булдылар - “Авыл территорияләрен комплекслы үстерү” дәүләт программасы кысаларында «Чистополье» агрофирмасы хезмәткәрләре гаиләләре өчен 11 йорт төзелгән. Торак комплексына күчендерү быел март аенда булган.
Торак йортларны карап йөргәндә Рөстәм Миңнеханов, Оксана Лут һәм Марат Җәббаров бер гаиләгә кунакка керделәр һәм гаилә әгъзалары белән аралаштылар. Мондый проектларны гамәлгә ашыру – авыл хуҗалыгы районнарының сәнәгать куәтен үстерү, ә иң мөһиме - кешеләрне авылда калдыру өчен төп инструментларның берсе.
Аннары Татарстанның Чистай районында «Чисто фри» ҖЧҖендә бәрәңге эшкәртү һәм консервлау заводын ачу тантанасы булды.
Завод «Чистай» алгарышлы үсеш территориясендә урнашкан, ул кирәкле инженерлык коммуникацияләре һәм бәрәңге кырларына якынрак булу исәпкә алынып төзелгән.
Предприятие «Чистополье» холдинг компаниясе» АҖенә карый - ул бәрәңге җитештерүчеләрнең иң эреләреннән берсе, шул исәптән фри һәм чипслар җитештерү өчен сортлар җитештерә. Элек эшкәртү өчен бәрәңге башка заводларга җибәрелгән һәм ваклап сатыла торган булган.
Яңа предприятие холдингка бәрәңгене эшкәртү һәм консервлау проектының беренче чиратын гамәлгә ашырырга мөмкинлек бирәчәк, елга 40 000 тонна бәрәңге эшкәртү планлаштырыла, һәм "Азык-төлек иминлеген технологик тәэмин итү" милли проектының максатларына һәм бурычларына туры килә.
«Чисто фри» ҖЧҖ җитештерү предприятисен ачуда сәламләү сүзләре белән Россия Федерациясе Авыл хуҗалыгы министрлыгы башлыгы Оксана Лут, Татарстан Рәисе Рөстәм Миңнеханов, «Чистополье» холдинг компаниясе» АҖ Директорлар советы рәисе Альберт Хөснуллин чыгыш ясадылар.
Бүген ачыла торган завод - азык-төлек сәнәгатенең икътисадый әһәмиятле объект, дип ассызыкланды. Россия авыл хуҗалыгы министры Оксана Лут сәламләү чыгышында бәрәңге эшкәртү предприятиеләренең икътисадый тотрыклылык һәм яшелчәчелек өчен бик мөһим булуын билгеләп үтте.
"Без бүген яңа саклагычларны карадык, предприятиенең ничек эшләвен күрдек. Бу - сугарулы җирләрдә продукция үстерү, һәм ул тотрыклы уңыш алырга һәм яшелчәләрнең тиешле сыйфатын саклап калырга мөмкинлек бирә. Узган елда бәрәңге эшкәртү базары 10%ка үсте, һәм, әлбәттә, Татарстан Республикасы территориясендә мондый предприятие төзү зур әһәмияткә ия. Төбәк барлык секторларда, шул исәптән шәхси ярдәмче хуҗалыкларда да, бәрәңге җитештерү буенча Россиядә икенче урында тора. Без киләчәктә дә бу юнәлешкә ярдәм итәчәкбез. Якын киләчәктә бәрәңге эшкәртү буенча яңа проектлар барлыкка килер, дип ышанам. Предприятиегә алга таба үсеш телим", - диде Оксана Лут.
Татарстан Рәисе Рөстәм Миңнеханов: "Без бүген «Чистополье» холдингында эшнең системалы һәм стратегик яктан дөрес алып барылуына тагын бер кат инандык.
Рөстәм Миңнеханов бүген Россия Федерациясе Авыл хуҗалыгы министрлыгы башлыгы белән бәрәңге саклагычта һәм сортларга аеру комплексында, шулай ук холдинг хезмәткәрләре өчен төзелгән яңа торакта булуларын искәртеп узды.
«Чистополье» холдингы бүген үсемлекчелек, авыл хуҗалыгы продукциясен эшкәртү буенча һәм мелиорация өлкәсендә иң заманча һәм инновацион холдингларның берсе, - дип белдерде Рөстәм Миңнеханов. - Бу юнәлешләр буенча «Чистополье» холдингы уңай нәтиҗәләр күрсәтә. Сезгә уңышлы эшләр телим һәм барлык проектларның да республика җитәкчелеге тарафыннан хупланачак, дип ышандырам".
«Чистополье» холдинг компаниясе» АҖ Директорлар советы рәисе Альберт Хөснуллинга яңа предприятиенең символик ачкычы тапшырылды.
Үз чиратында, Альберт Хөснуллин «Чистополье» холдинг компаниясе исеменнән Федераль авыл хуҗалыгы министрлыгына һәм Татарстан Республикасы җитәкчелегенә ярдәмнәре өчен рәхмәт белдерде. "Ярдәмегез өчен без сезгә зур рәхмәтле, - диде ул. - Сезнең ярдәмнән башка без мондый темплар белән үсә алмас идек».
Искәртеп узабыз, «Чисто фри» ҖЧҖендә бәрәңге эшкәртү һәм консервлау буенча яңа завод бик кыска срокларда һәм алдынгы технологияләрне кулланып төзелде, җитештерүне ачу – республиканың бөтен агросәнәгать комплексы һәм аеруча «Чистополье» холдингы үсешендә мөһим этап.
Завод ачылганнан соң «Чистополье» хоккей клубының кыскача презентациясе булды. Холдингта саклау һәм логистика өчен сыйфатлы инфраструктура булдырылган. Бу - үзләренең 5 элеваторы, 42 мең тоннага исәпләнгән яшелчә саклагычлар, зур техника автопаркы. Терлекчелек өлкәсендә дә зур эш башкарыла: холдинг структурасында 15 ит-сөт фермасы эшли, шулай ук кошчылык фабрикасы бар, быел «Чистополье» казылык цехы ачкан.