Татарстанда «Российское поле - 2025» II бөтенроссия селекционерлар һәм орлыкчылар форумы эшли башлады
Бүген Татарстанда «Агробиотехнопарк» базасында «Русское поле - 2025» II бөтенроссия селекционерлар һәм орлыкчылар форумы эшли башлады. Чара Россия Федерациясе Авыл хуҗалыгы министрлыгы ярдәмендә оештырылды. Анда Татарстан Республикасы авыл хуҗалыгы һәм азык-төлек министрының беренче урынбасары Ленар Гарипов, министр урынбасары Дмитрий Яшин, «Щелково Агрохим» АҖ генераль директоры Салис Каракотов, «Национальный Семенной Альянс» коммерциягә карамаган оешма Советы рәисе Игорь Лобач, Казан дәүләт аграр университеты (КДАУ) ректоры вазыйфаларын вакытлыча башкаручы Илшат Нуриев һәм RUSEED селекция-орлыкчылык компаниясенең идарәче партнеры Марк Гехт катнашты.
Форум Россиядә селекцияне һәм орлыкчылыкны үстерүнең актуаль мәсьәләләре һәм стратегик перспективалары турында фикер алышу өчен Россия селекция фәне, генетика, биотехнологияләр буенча танылган галимнәрне, орлык җитештерүче компанияләргә нигез салучыларны һәм аларның җитәкчеләрен, эшкуарларны, федераль һәм төбәк хакимияте вәкилләрен берләштерә.
"Быел без үзебезнең сынау кишәрлекләрен сизелерлек киңәйттек. Узган ел көнбагыш белән генә тәҗрибәләр үткәрелгән булса, хәзер сынауларда соя һәм кукуруз да катнаша. Шикәр чөгендере чәчүлекләрен дә кертеп, барлыгы 7 авыл хуҗалыгы культурасы тәкъдим ителде. Бу нәкъ менә элек импортка бәйлелек күзәтелгән стратегик мөһим культуралар", - дип билгеләде Дмитрий Яшин.
Әлеге мәйданчык ил селекциясе казанышлары һәм аларның практикада кулланылышы белән танышу өчен менә дигән мөмкинлек бирә. Әлеге эш нәтиҗәсендә быел төбәктәге шикәр чөгендере чәчүлекләренең 50%ы үзебезнең сортлардан тора. Көнбагыш белән дә шундый ук хәл - Татарстанда чәчүлекләрнең яртысы диярлек Россия селекциясе сортларыннан тора, бу узган ел белән чагыштырганда шактый алга китешне күрсәтә.
Министр урынбасары сүзләренә караганда, мондый форумнар безнең алга таба үсешебездә мөһим роль уйный, алар Россиягә, үзебезнең авыл хуҗалыгы казанышларын күрсәтү белән бергә, үзебезнең эшләнмәләрне гамәлгә кертү нәтиҗәсендә югары уңыш алырга мөмкинлек бирә. Сезне безнең күрсәтмә мәйданчыгында күрүебезгә шатбыз, - дип ассызыклады Дмитрий Яшин.
Форум кысаларында илнең селекция үсеше перспективалары, селекционерларның һәм кулланучыларның үзара хезмәттәшлеге, селекциядә һәм орлыкчылыкта халыкара хезмәттәшлек, синтетик биология һәм селекциядә аның катышмалары, орлыкчылыкта һәм селекциядә климат үзгәрешләре һәм аларның фаразлары темасына тематик түгәрәк өстәлләр узды.
Аларда Россия Федерациясендә селекцияне цифрлы үстерү, АПК тармагында, бигрәк тә үсемлекчелек буенча кадрлар әзерләү һәм тармакның инвестицион җәлеп итүчәнлеге факторы буларак селекциядә интеллектуаль милекчелекне яклау мәсьәләләре турында фикер алыштылар.
Исегезгә төшерәбез, 21 августта узачак пленар утырыш төп вакыйга булачак, аны Россия Федерациясе авыл хуҗалыгы министры Оксана Лут үткәрәчәк. Анда селекция һәм орлыкчылык өлкәсендә дәүләт сәясәтенең төп мәсьәләләре турында фикер алышачаклар.
Форум 21 августка кадәр дәвам итә, программа белән түбәндәге сайтта танышырга мөмкин: https://xn--e1aanfgibcfgida0aln.xn--p1ai/
Әлеге чара Россиянең, шул исәптән Татарстан Республикасының агросәнәгать комплексын үстерүгә юнәлдерелгән «Азык-төлек иминлеген технологик тәэмин итү» яңа илкүләм проектының максатларына һәм бурычларына туры килә.