Марат Җәббаров: "Максатчан укыту тармакның урта һәм озак срокка исәпләнгән үсешенә турыдан-туры йогынты ясый"
Бүген Татарстан Республикасы Авыл хуҗалыгы һәм азык-төлек министрлыгында авыл мәктәпләрен тәмамлаучыларны югары аграр белем бирү мәгариф оешмаларында максатчан укытуга җәлеп итү мәсьәләләре буенча киңәшмә узды. Анда Татарстан Республикасы Премьер-министры урынбасары - Татарстан Республикасы авыл хуҗалыгы һәм азык-төлек министры Марат Җәббаров, министрның беренче урынбасары Ленар Гарипов һәм «Казан дәүләт аграр университеты» югары һөнәри белем бирү ФДБМУ ректоры вазыйфаларын вакытлыча башкаручы Илшат Нуриев катнашты.
Чара Татарстан Республикасы муниципаль районнары вәкилләре катнашында видеоконференция режимында узды.
Казан дәүләт аграр университеты агрономия, ветеринария, урман хуҗалыгы, биотехнология, зоотехния, экология, роботлаштыру һәм автоматлаштыру, агросәнәгать комплексына мәгълүмат системаларын проектлау һәм кертү өлкәсендә белгечләр әзерләү буенча әйдәп баручы югары уку йорты булып тора.
Аграр сектор өчен студентларны максатчан әзерләү тармакның кадрларга ихтыяҗын тәэмин итәргә һәм университет белән эш бирүчеләр арасында тотрыклы элемтәне тәэмин итәргә мөмкинлек бирә торган мөһим инструмент булып тора. Абитуриент, максатчан нигездә укып, оешма (заказчы) белән килешү төзи, югары уку йортында бюджет нигезендә укый, эш бирүчедән ярдәм ала, ә университетны тәмамлагач, сайлаган предприятиедә гарантияле эшкә урнаша.
Марат Җаббаров, агымдагы шартларда Татарстан Республикасы агросәнәгать комплексы өчен кадрлар әзерләү мәсьәләләре аерым игътибарны һәм системалы мөнәсәбәтне таләп итә, дип ассызыклады. Бу бигрәк тә терлекчелеккә бәйле юнәлешләргә кагыла, чөнки республика бу өлкәдә илнең әйдәп баручы төбәкләренең берсе статусына ия.
Аның әйтүенчә, максатчан укыту районнарны конкрет оешмаларга һәм хуҗалыкларга эшкә кайтырга әзер булган квалификацияле белгечләр белән тәэмин итүдә нәтиҗәле механизм булып тора.
“Максатчан укытуга заявкалар ясау - ул формаль күренеш кенә түгел, ә кадрларны планлаштыруда тармакның урта һәм озак срокка исәпләнгән тотрыклы үсешенә турыдан-туры йогынты ясый торган кирәкле элемент”, - диде министр.
Илшат Нуриев әйтүенчә, узган ел университет студентларны максатчан җыюны тәэмин итү бурычын үз өстенә алган, «Казан дәүләт аграр университеты» югары һөнәри белем бирү ФДБМУ буенча барлыгы 283 студент.
“Бүген Казан дәүләт аграр университетына максатчан укырга керүчеләр өчен барлык шартлар да тудырыла, бу яңа һәм яңартылган тулай торакларда урыннар да, арттырылган күләмдәге стипендияләр дә һ.б.", — дип билгеләп үтте ул.
Агросәнәгать комплексында кадрлар тотрыклылыгын булдырып, тармакны квалификацияле белгечләр белән тәэмин итү өчен Татарстан Республикасында «Азык-төлек иминлеген технологик тәэмин итү» илкүләм проектының «АПКда кадрлар» федераль проекты гамәлгә ашырыла.
Казан дәүләт аграр университетына укырга керү өчен барлык кызыксындырган мәсьәләләр буенча кабул итү комиссиясенә мөрәҗәгать итәргә мөмкин, телефоннар: 8 (843) 598-40-48 (өстәмә. 706) һәм 8 (960) 056-76-67.