Министрлык делегациясе эш сәфәре белән Төркия Республикасында булды
Татарстан Республикасы Премьер-министры урынбасары — Татарстан Республикасы авыл хуҗалыгы һәм азык-төлек министры Марат Җәббаров җитәкчелегендәге Татарстан Республикасы Авыл хуҗалыгы һәм азык-төлек министрлыгы делегациясе эш сәфәре белән Төркия Республикасының Анталия шәһәрендә булды.
Кичә алар «Greenada Tarım Teknolojileri» компаниясенең теплица комплексында булдылар. Яшелчәләр үстерү оешмасына 2007 елда нигез салынган һәм хәзерге вакытта анда 170 төр продукция үстерелә: яшелчәләр, мини-яшелчәләр, яшел үләннәр, эгей үләннәре, яшел яфрак үләннәр, Урта диңгез салатлары, әзер салатлар, ашарга яраклы чәчәкләр һәм чүлмәк үләннәре.
Бүген Анталия Сәүдә биржасында Татарстан делегациясе Төркиянең Палаталар һәм товар биржалары берлеге идарәсе әгъзасы Али Чандыр белән очрашты. Эшлекле очрашу барышында яклар агросәнәгать комплексында тышкы икътисадый элемтәләрне үстерү һәм сәүдә мөнәсәбәтләрен ныгыту турында фикер алыштылар.
Аннары алар оештырылган сәнәгать зонасында булдылар, анда эре предприятиеләр өчен дә, кечкенә цехлар, складлар өчен дә оештырылган территориаль-сәнәгать берләшмәләре урнашкан. Территориядә барлыгы 330дан артык завод бар һәм аларның 20%ка якыны кояш энергиясе системасын куллана.
Оештырылган сәнәгать зонасы территориясендә Татарстан Республикасы делегациясе эре агросәнәгать предприятиеләре эшчәнлеге белән танышты. Алар арасында: «Cantek» компаниясе төркеме фабрикасы, «Yörükoğlu Süt» һәм «Grow Fide Tarım»компанияләренең җитештерү линияләре.
Анда алар сөт һәм сөт продуктларын җитештерү процессының заманча технологияләрен, үсентеләр җитештерүдә инновацион алымнарны һәм теплица хуҗалыгының заманча технологияләрен, шулай ук LED-яктырткычлар белән үсемлекчелекне, вертикаль игенчелек системаларын һәм ябык биналарда югары нәтиҗәле үстерү ысуллары белән таныштылар.
Татарстан Республикасы белән Төркия Республикасы арасында тышкы икътисадый багланышлар актив үсә. Узган ел нәтиҗәләре буенча Татарстан белән Төркия арасында товар әйләнеше ике мәртәбә арткан һәм 5,3 млрд доллар булган. Төркиядән атланмай фисташка һәм миндаль чыгарыла, Татарстан чүпрә, көнбагыш һәм сафлор мае җибәрә.
Үзара файдалы мөнәсәбәтләр партнерлыкны ныгыта һәм «Халыкара кооперация һәм экспорт» илкүләм проекты максатларына туры килә.