Минзәлә районында терлекчелек һәм терлек азыгы җитештерү буенча семинар-киңәшмә узды
Бүген Татарстан Республикасы Минзәлә муниципаль районында терлекчелек һәм терлек азыгы җитештерү буенча зона семинар-киңәшмәсе узды. Анда Татарстан Республикасы Премьер-министры урынбасары — Татарстан Республикасы авыл хуҗалыгы һәм азык-төлек министры Марат Җәббаров, министр урынбасары Гөлүс Баязитов, муниципаль районнар башлыклары, авыл хуҗалыгы идарәләре, ветеринария хезмәте һәм авыл хуҗалыгы предприятиеләре җитәкчеләре һәм белгечләре катнашты.
Семинар-киңәшмәдә катнашучылар эш сәфәре кысаларында “Татагрохим” ААҖнең база һәм алдынгы техника күргәзмәсе, җайланмалар һәм яңа технологияләр, шулай ук күпьеллык үләннәрне чәчү алдыннан һәм күпьеллык үләннәрне чәчү өчен туфракны эшкәртү алдыннан әче туфракны известьлау технологияләренең һәм «Камский бекон» ҖЧҖнең азык әзерләү технологияләренең үзенчәлекләре һәм республика азык лабораторияләре эше белән таныштылар.
Аннары алар «Камский Бекон» ҖЧҖ сөтчелек комплексында булдылар. Узган ел «Камский Бекон» компаниясе бозаулар өчен 6400 башка исәпләнгән 11 корпус төзегән, 3 мең баш савым сыеры өчен 6 корпус төзелеп килә. Сепарация ярдәмендә тирестән терлек аслыгы җитештерү җайланмасы эшли башлаган, бу аслык материалына тәүлеклек ихтыяҗны капларга мөмкинлек бирә. Бүлекчәдә 52 трактор, 9 ашлык җыю комбайны, 7 азык җыю комбайны, 6 чәчү комплексы, 6 культиватор, 5 тирәнтен йомшарту җайланмасы, 6 сиптергеч бар.
Аннары район Мәдәният йортында семинарның теоретик өлеше барышында Марат Җәббаров агымдагы елның 4 аенда терлекчелек тармагы эшенә йомгаклар ясады һәм терлек азыгы җитештерү буенча бурычлар куйды.
Май башына республиканың авыл хуҗалыгы оешмаларында 609 мең тонна сөт җитештерелгән, бу узган елга караганда 5%ка күбрәк. Бер сыердан 2884 кг сөт алынган, 2024 елга карата 174 кг күбрәк. 137 мең тонна терлек һәм кош ите җитештерелгән. Узган елга карата артым 1% тәшкил итә.
Марат Җәббаров сыерлар бәйдә тотыла торган абзарларны яңарту бурычын куйды. Бәйсез тотуның нәтиҗәсе бәйдә тотуга караганда югарырак, бу хезмәткәрләрнең хезмәт җитештерүчәнлеген арттыру, саву һәм ашату процессларын автоматлаштыру, продуктивлылыкны арттыру исәбенә шулай килеп чыга.
“200 баш һәм аннан күбрәк сыерлар бәйдә тотыла торган абзарларны бәйсез тотуга күчерүгә, шунда ук саву-сөт блогы төзүгә республика бюджетыннан чаралар каралган. Шулай ук 140-1000 башка сыер абзарлары төзүгә субсидияләр бирелә”, - дип ассызыклады министр.
Аның әйтүенчә, сөт терлекчелегендә алдынгы мәгълүмати технологияләр кертү мөһим үсеш ноктасы булып тора һәм терлекләр белән идарә итү программасын нәтиҗәле гамәлгә ашыручы хуҗалык буларак Тәҗмиев Р.Н. КФХсын мисалга китерде.
Цифрлаштыру хуҗалыкка сөт җитештерүне арттырырга һәм финанс күрсәткечләрен шактый күтәрергә мөмкинлек бирде. Әлеге тәҗрибә аграр секторны үстерүдә заманча технологияләрнең нәтиҗәлелеген раслый, бу «Белешмәләр икътисады һәм дәүләтнең цифрлы трансформациясе» илкүләм проекты максатларына һәм бурычларына туры килә.
Марат Җәббаров терлек азыгы әзерләүнең башлануы турында әйтте. Сыйфатлы азык алу өчен белем һәм күнекмәләр, технологияне үтәү, заманча һәм төзек техника кирәк. Азык сыйфатлырак булган саен - продуктивлык югарырак һәм сатып алына торган азыкка чыгымнар азрак була. «Бүгенге көндә азык-төлек иминлеге аеруча актуаль», - дип билгеләп үтте министр.
Гөлүс Баязитов сыйфатлы азык әзерләү нигезләре турында сөйләде, сенаж һәм силос әзерләүнең стратегиясен һәм тактикасын билгеләде.
Үләннәрдән азык әзерләүнең төп үзенчәлекләренә түбәндәгеләр керә: үләннәр үстерүгә карата агротехник таләпләрнең үтәлеше, күпьеллык үләннәрнең елдан-ел биохимик составы үзгәрү, терлек азыгы әзерләү технологиясен контрольдә тоту ысуллары, үләннәрне җыюның оптималь срокларын сайлау, кирәкле микроб әчеткечләрен дөрес сайлау һәм кирәкле азык күләмен әзерләү чорлары буенча төгәл исәпләү.
Семинар-киңәшмә барышында шулай ук савымны өстәмә чыгымнарсыз арттыру, Татарстан Республикасы авыл хуҗалыгын цифрлаштыру мәсьәләләренә һәм республикада терлек азыгы җитештерүнең чимал конвейеры компоненты буларак корылыкка чыдам культураларның азык кыйммәтен өйрәнү нәтиҗәләренә аерым игътибар бирелде.
Чара азагында Марат Җәббаров һәм Минзәлә муниципаль районы башлыгы Айдар Сәлахов Татарстан Республикасы агросәнәгать комплексының җитештерү алдынгыларына бүләкләр тапшырдылар.