Министрлыкта агросекторда эшләүгә мигрантлар җәлеп итү турында фикер алыштылар
Татарстан Республикасы Авыл хуҗалыгы һәм азык-төлек министрлыгында төбәкнең агросәнәгать комплексында эшләү өчен хезмәт мигрантларын җәлеп итү мәсьәләләренә багышланган очрашу узды. Чараны министрның беренче урынбасары Ленар Гарипов уздырды. Киңәшмәдә шулай ук Татарстан Республикасы Авыл хуҗалыгы һәм азык-төлек министрлыгының кадрлар бүлеге башлыгы Лилия Хуҗина, Татарстан Республикасы Хезмәт һәм халыкны эш белән тәэмин итү министрлыгының хезмәт миграциясе бүлеге башлыгы Азат Әюпов, Татарстан Республикасы Авыл хуҗалыгы һәм азык-төлек министрлыгының авыл хуҗалыгы идарәләре хезмәткәрләре һәм агросәнәгать комплекслары инвесторлары катнашты. Чакырылган экспертлар арасында Үзбәкстаннан, Таҗикстаннан һәм хезмәт миграциясендә махсуслашкан халыкара оешмалардан кадрлар агентлыклары вәкилләре бар иде.
Очрашуда катнашучылар чит илләрдән эшчеләр җәлеп итүнең төп аспектлары, шул исәптән хезмәт, түләү, яшәү һәм туклану шартлары, шулай ук рәсмиләштерү һәм күченү чыгымнары турында фикер алыштылар. Гражданнары Россия шартларына уңышлы җайлаша ала һәм авыл хуҗалыгы һөнәрләрен үзләштерергә әзер булган илләргә аерым игътибар бирелде. Болар, аерым алганда, Үзбәкстан, Таҗикстан, Һиндстан, Бангладеш, Пакистан һәм Непал мигрантларына кагыла. Катнашучылар тарафыннан хезмәттәшлекнең төрле вариантлары тәкъдим ителде, шул исәптән Россиядә вакытлыча эшкә урнашу өчен хезмәткәрләрне оешкан рәвештә җыю турындагы килешүләрне имзалау вариантлары да каралды.