Аксубай районында умартачылыкны үстерү турында фикер алыштылар
Татарстан Республикасы Аксубай муниципаль районында умартачылыкны үстерү мәсьәләләре буенча семинар-киңәшмә узды. Анда Татарстан Республикасы Аксубай муниципаль районы башлыгы Алмаз Миңнегулов, Татарстан Республикасы Авыл хуҗалыгы һәм азык-төлек министрлыгының умартачылык һәм аквакультура секторы мөдире Динард Гатауллин, җирле үзидарә органнары һәм республика муниципаль районнарындагы авыл хуҗалыгы һәм азык-төлек идарәләре вәкилләре, агросәнәгать предприятиеләре җитәкчеләре һәм умартачылар катнашты.
Очрашу кысаларында катнашучылар умартачылыкны алып бару өчен урман фондыннан җирләр бүлеп бирү, умарталарның азык базасы мәйданнарын арттыру, ветеринария паспортларын рәсмиләштерү һәм умарта ояларын вакытында идентификацияләү (маркировкалау), шулай ук умартачыларны укыту һәм аларның квалификациясен күтәрү, умартачылык өлкәсендә кадрлар белән тәэмин ителеш, умарталарның урта рус токымының генофондын саклау умартачылык хуҗалыклары тарафыннан нәсел статусы алу, башка илләрдән умарта паектлары кайтару, биологик препаратларның нәтиҗәлелеген күрсәтү максатларында баллы культуралар чәчү өчен тәҗрибә кырлары булдыру мәсьәләләре буенча фикер алыштылар.
Киңәшмә барышында умарталарның сакланышын тәэмин итү, умартачылык продукциясе күләмнәрен арттыру, алына торган продукциянең сыйфатын арттыру, пестицидлар һәм агрохимикатлар кулланганда закон таләпләрен үтәү, авыл хуҗалыгы культураларын эшкәрткәндә биологик препаратлар куллану мәсьәләләре каралды.
"Умартачылыкны үстерү буенча семинар-киңәшмәләр үткәрү җитәкчеләрне, агрономнарны һәм умартачыларны берләштерә, авыл хуҗалыгы культураларын эшкәрткәндә үсемлекләрне яклауның бары тик рөхсәт ителгән һәм имин чараларын гына куллану мәсьәләләрендә аларның үзара аңлашуын арттыра. Бу умарталарның популяциясен саклап калырга һәм умартачылыктан экологик чиста продукция алырга ярдәм итә", - диде Динард Гатауллин.
Чара ахырында Динард Гатауллин умартачыларга Татарстан Республикасы Авыл хуҗалыгы һәм азык-төлек министрлыгының Мактау грамоталарын һәм Рәхмәт хатларын тапшырды.