Гадәттәге авыл хуҗалыгы ярминкәләрендә ярты миллиард сумнан артык продукция сатылган
Республикада 14 сентябрьдән гадәттәге авыл хуҗалыгы ярминкәләре эшли башлады, алапр Казан шәһәрендә 13 мәйданчыкта, Чаллыда һәм Зеленодольск районында 2шәр мәйданчыкта, Түбән Камада 3 мәйданчыкта һәм муниципаль районнарда төрле даимилектә уза.
Казандагы ярминкә мәйданчыкларын бүген Татарстан Республикасы Премьер-министры урынбасары - Татарстан Республикасы авыл хуҗалыгы һәм азык-төлек министры Марат Җәббаров һәм министрның беренче урынбасары Ленар Гарипов карап чыктылар.
Инде иртәнге 6да ук мәйданчыкларда сәүдә итү башланды. Сатуда ит һәм сөт продуктлары, яшелчәләр, бал, ярмалар һәм бакалея - барысы да уртача ваклап сату бәяләреннән түбәнрәк. Ярминкәләр шәһәр халкы өчен дә, авыл хуҗалыгы продукциясен җитештерүчеләр өчен дә бик мөһим, чөнки алар үз товарларын турыдан-туры, арадашчылардан башка сата алалар һәм сәүдә урыннарын арендалау өчен түләмиләр, бу исә аларның үзкыйммәтен шактый киметә.
7 ярминкә атнасы йомгаклары буенча 556,3 млн. сумлык авыл хуҗалыгы продукциясе сатылган, шулардан 4 717,8 тонна яшелчә, шул исәптән 3 019,7 тонна бәрәңге, 116,8 тонна үлчәүле сөт, 334,6 тонна шикәр, 1 259,5 мең данә тавык йомыркасы, 533,2 тонна ит, шул исәптән 300,4 тонна сыер ите.
Ярминкәләр үткәрү өчен 6 800 транспорт берәмлеге җәлеп ителгән.
Ярминкәләрне 2024 елның 29 декабренә кадәр уздыру каралган (16 ярминкә атнасы).