Казанда «Россиянең авыл икмәк пешерүчеләре кубогы - 2024» Бөтенроссия конкурсы узды
Бүген Казан кооператив институтында «Россиянең авыл икмәк пешерүчеләре кубогы - 2024» Бөтенроссия конкурсы узды. Анда Россия Федерациясе Авыл хуҗалыгы министрлыгының Авыл территорияләрен үстерү департаменты директоры Виталий Платонов, Татарстан Республикасы авыл хуҗалыгы һәм азык-төлек министры урынбасары Марсель Мәхмүтов һәм Татарстан Республикасы Дәүләт Советы депутаты Алсу Нәбиева катнаштылар.
Конкурс Россиянең барлык округларыннан икмәк пешерү осталарын берләштерде. Кубок «Авыл территорияләрен комплекслы үстерү» дәүләт программасын гамәлгә ашыру кысаларында үткәрелә һәм кече хуҗалыкларга ярдәм итү өчен булдырылган. Анда Россия Федерациясенең 8 субъектыннан командалар катнашты, алар читтән торып конкурс узу этабында катнашкан 126 катнашучы арасыннан сайлап алынды. Финалга Иваново өлкәсе, Коми Республикасы, Татарстан Республикасы, Омск өлкәсе, Ставрополь крае, Камчатка крае, Чиләбе өлкәсе һәм Луганск Халык Республикасы предприятиеләре чыкты.
Татарстан Республикасыннан Татарстан Республикасы Тәтеш муниципаль районының «Икмәк» катнаш авыл хуҗалыгы җитештерү кооперативы хезмәткәрләре - Нурзия Сибгәтова, Наталья Митрюшкина һәм Наталья Участкина катнаштылар.
Кубок авыл территорияләрен үстерү өлкәсендәге казанышларны популярлаштыру һәм хөрмәтләү, авыл агломерацияләрендә яшәүчеләрне эш белән тәэмин итү, икмәк пешерү бизнесының гаилә форматын популярлаштыру һәм авыл территорияләренә квалификацияле белгечләр җәлеп итү максатында үткәрелә.
“Дөньяда иң популяр продуктларның берсе, аннан башка, мөгаен, безнең тормышның бер генә көне дә узмыйдыр – бу, әлбәттә инде, икмәк. Борын-борыннан икмәккә өстәлдә иң хөрмәтле урын бирелгән, ул яшәеш символы булган һәм шулай булып кала да. Бүген биредә үз эшенең чын осталары, талантлы икмәк пешерүчеләр, икмәк традицияләрен саклаучылар җыелган. Сезнең хезмәтегез икмәк пешерү генә түгел, ул җан азыгы булдыру, илебезнең азык-төлек иминлегенә өлеш кертү, кешеләрнең сәламәтлеге һәм иминлеге турында кайгырту”, - дип билгеләп үтте Марсель Мәхмүтов.
Агымдагы елның 9 аенда Россия Федерациясе буенча 5700 мең тоннадан артык икмәк һәм икмәк-күмәч әйберләре җитештерелгән. Җитештерү буенча Идел буе федераль округы икенче урында тора - 1050 мең тонна. Иң алдынгы урынны Үзәк федераль округы алып тора - 2 000 мең тоннадан артыграк, өченче урында - Төньяк-Көнбатыш федераль округы - 600 мең тонна. Россия территориясендә икмәк һәм икмәк-күмәч эшләнмәләре җитештерү узган елның шул ук чоры белән чагыштырганда 4%ка диярлек арткан.
Татарстанда икмәк һәм икмәк-күмәч әйберләрен 70тән артык икмәк пешерү предприятиесе җитештерә һәм 9 айда 115 мең тонна продукция җитештерелгән. Тармакта 3,5 меңнән артык кеше эшли.