ТатАгроЭкспо – 2024: вакыйгаларга бай өч көн
Бүген агросәнәгать комплексы казанышларының ТатАгроЭкспо - 2024 VI махсуслаштырылган авыл хуҗалыгы күргәзмәсен ябу тантанасы узды. Чарада Татарстан Республикасы авыл хуҗалыгы һәм азык-төлек министрының беренче урынбасары Ленар Гарипов катнашты.
“Барыгызны да күргәзмәнең уңышлы тәмамлануы белән котлыйм! Быел ТатАгроЭкспо тагын да масштаблырак узды”, – дип билгеләп үтте Ленар Гарипов.
Күргәзмә, беренче тапкыр «Казан Экспо» күргәзмә үзәгенең традицион павильоннары кысаларыннан чыгып, павильоннар эчендә генә түгел, ә галереяда, шулай ук ачык урам мәйданчыгында бай экспозиция тәкъдим итте.
Күргәзмәдә Россиянең 35 төбәгеннән һәм 5 илдән барлыгы 253 компания катнашты. Татарстан Республикасы районнарыннан 29 хуҗалык үзләренең фермерлар продукциясен күрсәтте. Шулай ук күргәзмәдә беренче тапкыр агрохакатон узды, анда аграр югары уку йортларыннан 5 команда студентлары үз эшләнмәләрен тәкъдим иттеләр.
Өч көн эчендә күргәзмәдә 43 төбәктән һәм 8 илдән (Беларусь, Төркия, Кыргызстан, Монголия, Мисыр, Сербия һәм Берләшкән Гарәп Әмирлекләре) 11 750 кунак булды.
Тантана экспонентларга дипломнар тапшыру белән тәмамланды. Ленар Гарипов шулай ук партнерларны 3 июльдән 5 июльгә кадәр узачак «Агроволга – 2024» күргәзмәсенә чакырды.