Рөстәм Миңнеханов: авыл хуҗалыгы идарәләренең оперативлыгы - агросәнәгать комплексының сыйфатлы эшләве өчен кирәкле элемент
Бүген «Казан Экспо» күргәзмә комплексы территориясендә районнарның авыл хуҗалыгы һәм азык-төлек идарәләре хезмәткәрләренә автомобильләр тапшыру тантанасы узды. Чарада Татарстан Республикасы Президенты Рөстәм Миңнеханов катнашты.
Тантана Татарстан Республикасы Авыл хуҗалыгы һәм азык-төлек министрлыгының йомгаклау коллегиясе кысаларында узды. "Бүген без республикабыз агросәнәгать комплексының 2022 елдагы эшенә йомгаклар ясыйбыз. Авыл хуҗалыгы - авыр һәм бик мөһим хезмәт. Игенчелек, терлекчелек һәм авыл хуҗалыгының башка юнәлешләре елга 365 көн һәм тәүлек әйләнәсе шөгыльләнүне таләп итә. Һәм районнарның авыл хуҗалыгы идарәләре хезмәтләренең оперативлыгы - безнең сыйфатлы эшләвебез өчен кирәкле элемент", - дип ассызыклады Рәис.
Ул билгеләп үткәнчә, республика аграрийлары узган ел йомгаклары буенча макктаулы нәтиҗәләргә ирешкәннәр. “Татарстан - илнең әйдәп баручы агросәнәгать төбәкләреннән берсе. Агросәнәгать комплексы хезмәткәрләренә киеренке, фидакарь хезмәтегез өчен рәхмәт әйтәсем килә, шулай ук алга таба хезмәтегездә уңышлар телим”, - дип өстәде Рөстәм Миңнеханов.
Районнарның авыл хуҗалыгы идарәләренә барлыгы 43 машина тапшырылды.