Хезмәт кешеләре:таләпчән һәм кешеләр турында кайгыртучан кошчылык фабрикасы җитәкчесе
Үзенең көндәлек хезмәте белән хөрмәт һәм абруй казанган гади кешеләр турында языла торган безнең «Хезмәт кешеләре» рубрикасының бүгенге герое авыл хуҗалыгында 43 елдан артык эшләгән Фәйзеләхәт Гаяз улы Фәсахов.
Фәйзеләхәт Фәсахов 1941 елның 30 августында Татарстан АССРның Яңа Чишмә районы Зирекле авылында туа. Хезмәт эшчәнлеген, 1963 елда Чистай кырларында Казан авыл хуҗалыгы институтын тәмамлаганнан соң, «Буревестник» совхозында һәм «Дружба» колхозында агроном булып эшләүдән башлый. Озак та үтми тырыш, җаваплы белгечне колхоз рәисе итеп сайлап куялар.
Ике ел эчендә ул артта калган хуҗалыкны алдынгылар рәтенә чыгара. 1970 елда колхоз бөтен байракларны диярлек яулый:уңдырышлылык, терлекчелек, туңга сөрү һәм хәтта зур уңыш өчен Россия Федерациясенең Кызыл Байрагын да ала.
1970 елда Фәйзеләхәт Гаяз улы “Чистай” кошчылык фабрикасын җитәкли. Предприятиедә шунда ук азык җитештерү җайга салына, катнаш азык цехы төзелә. Алар базарга заманча кошчылык биналары, инкубаторлар, автоном котельный, суыткычлар һәм остаханәләр белән керәләр. Биредә барысы да аның тәкъдимнәре белән, турыдан-туры аның катнашында булдырылган.
Фәйзеләхәт Гаяз улы табигате буенча бик тыныч һәм тыйнак кеше булган, әмма предприятиедә тәртипне катгый тоткан. Һәрвакыт таләпчән, гадел, ярдәмчел, кешеләргә игътибарлы җитәкче булган. Аның, җитәкче буларак, максаты, теләге бер нәрсә була:"Иң мөһиме – кешеләрнең тамагы тук, урыннары җылыда булсын". Холкы буенча ул иң яхшы мәгънәдә консерватор була. Крестьян буларак, бик сакчыл һәм бар нәрсәне кат-кат уйлап эшләгән, җиде кат үлчәп, бер кат кисүче, дигән сүзләр аңа бик тә туры килә.
Аның төп сыйфаты – даимилек һәм кешеләргә яхшы мөнәсәбәт. Аның предприятиесендә барлык белгечләр дә диярлек, китмичә, еллар һәм дистә еллар эшләгәннәр. Биредә кошчылык династияләре дә шактый күп. Мотыйгуллиннар, Җәләлетдиновлар, Гатиннар…
Эшчәнлек чорында ул Чистай район Советы депутаты да була.
Хезмәт казанышлары һәм авыл хуҗалыгын үстерүгә зур өлеш кертүе өчен ул күп кенә хөкүмәт бүләкләренә лаек була. Аңа «Татарстан Республикасының атказанган авыл хуҗалыгы хезмәткәре» исеме бирелә. Ул Ленин ордены, Почет билгесе, ике Хезмәт Кызыл Байрагы ордены белән бүләкләнә. Фәйзеләхәт Гаяз улы безнең арада юк инде, әмма аның турындагы якты хәтирәләр озак еллар әле безнең күңелләрдә сакланыр.