Авыл хуҗалыгы һәм азык-төлек министрлыгы гаилә фермаларына грант ярдәме инструментларын камилләштерә
Татарстан Республикасы Авыл хуҗалыгы һәм азык-төлек министрлыгы хәбәр итүенчә, авыл хуҗалыгын үстерүнең дәүләт программасын гамәлгә ашыру кысаларында 2020 елдан гаилә терлекчелек фермаларына ярдәм бирүнең кайбер кагыйдәләре үзгәрәчәк.
Төп яңалык грант алучылар хуҗалыкларында эш урыннары булдыру шартларын үзгәртү булачак: элек фермер эш урыннарын грант алынган елдан катгый рәвештә булдырырга тиеш булса, 2020 елдан ул бу срокны алынган дәүләт акчаларын куллану чоры дәвамында мөстәкыйль билгели алачак. Гаилә фермалары өчен ул срок ел булачак.
Шулай ук 2020 елдан гаилә фермасына үсемлекчелек өлкәсендәге проектларны гамәлгә ашыруга хокуклар бирү күздә тотыла, ә ана сарыклар һәм кәҗәләр үрчетүнең максималь санын 500 башка кадәр арттыру планлаштырыла.
Барлык категорияләр өчен грант алуның яңа юнәлеше кертелә: грантны ташламалы инвестиция кредитын җәлеп итеп гамәлгә ашырыла торган проект хакының өлешен түләүгә җибәрү мөмкинлеге булачак. Бу механизмны кертү өчен Россия Федерациясе Авыл хуҗалыгы министрлыгы кредит оешмалары һәм тармак берлекләре белән берлектә фермер хуҗалыкларын һәм кооперативларны үстерүнең үрнәк проектларын эшли. Аларны гамәлгә ашыру грант алучылар эшчәнлегенең нәтиҗәлелеген һәм керемен арттырачак.