Татарстанда АПК продукциясен экспортлау 4%ка артты
Бу елның гыйнвар-март айларында Татарстанның агросәнәгать комплексы продукциясе 36,8 млн долларга экспортланды. «Бу 2018 елның шушы чорына караганда 1,4 млн долларга яки 4%ка күбрәк», – дип билгеләп үтте Татарстан Республикасы Авыл хуҗалыгы һәм азык-төлек министрлыгының азык-төлек базарын үстерү бүлеге башлыгы Дмитрий Яшин, ул шулай ук 2024 елга республикадан АПК продукциясен экспортлау күләмен ике мәртәбә артттыруны күздә тотучы максатчан күрсәткечләрнең раслануын да искәртеп узды.
Республикада шулай ук АПК продукциясен үстерү буенча юл картасы проекты әзерләнде, экспортланучы продукция исемлеге һәм тармакның эре предприятиеләре буенча 2019 елга фаразланучы экспорт күләмнәре эшләнде.
«Агымдагы елда республиканың АПК продукциясен 308,1 млн доллар күләмендә экспортлау күздә тотыла», – дип хәбәр итте Дмитрий Яшин.
Чит илгә чыгарыла торган продукциянең шактый өлешен май продукциясе тәшкил итәчәк – ведомство исәпләүләре буенча ул 232,0 млн долларга экспортланачак.
Моннан тыш, быел тышкы базарларга 16,8 млн долларга - ашлык, 4,5 млн долларга - ит һәм сөт, 19,4 млн долларга - әзер продукция, 35,4 млн долларга башка продуктлар чыгару планлаштырыла, – дип өстәде Дмитрий Яшин.
Бүген республиканың АПК продукциясе уннарча ерак һәм якын чит илләргә чыгарыла. Продукцияне экспортлаучы эре предприятиеләр арасында – «Казан майэкстракция заводы» АҖ, «Нәфис-Биопродукт» АҖ, «Эссен продакшн АГ» АҖ, «Таткрахмалпатока» АҖ, «Татспиртпром» АҖ һәм башка компанияләр бар.
Шуны искәртәбез, Россия АПКсы алдына 2024 елга үзебезнең авыл хуҗалыгы продукциясен экспортлауны елга 45 млрд доллар күләмендә тәэмин итү бурычы куелган. Илдә гамәлгә ашырыла торган «Агросәнәгать комплексы продукциясен экспортлау» федераль проекты якындагы берничә елда читкә чыгарыла торган продукция күләмен ике мәртәбә арттыруны күздә тота.