Рөстәм Миңнеханов: Безнең кешеләр – авылның төп байлыгы
Бүген Казан теннис академиясендә Авыл хуҗалыгы һәм эшкәртү сәнәгате хезмәткәрләре көне уңаеннан Татарстан Республикасы Президенты Рөстәм Миңнехановның авыл хуҗалыгы хезмәтчәннәрен кабул итү танатанасы булды. Чарада Татарстанның Дәүләт Киңәшчесе Минтимер Шәймиев, Татарстан Республикасы Премьер-министры Алексей Песошин, Татарстан Республикасы Дәүләт Советы Рәисе Фәрит Мөхәммәтшин, Татарстан Республикасы Президенты Аппараты җитәкчесе Әсгать Сәфәров, Татарстан Республикасы Премьер-министры урынбасары – Татарстан Республикасы авыл хуҗалыгы һәм азык-төлек министры Марат Әхмәтов, республика министрлыклары һәм ведомстволары җитәкчеләре, муниципаль районнар башлыклары, АПК вәкилләре катнашты.
Авыл хуҗалыгы – республика икътисадының төп тармагы һәм республиканың азык-төлек иминлегенең нигезе булып тора, диде Рөстәм Миңнеханов, тантананы ачып. Рөстәм Миңнеханов билгеләп үткәнчә, авыл хуҗалыгы һәм азык-төлек сәнәгатенә республика җыелма төбәк продуктының 11%ы туры килә. Авыл хуҗалыгы җыелма продукция күләме буенча Россия Федерациясе субъектлары арасында Татарстан лидерлар рәтендә һәм Идел буе федераль округында беренче урында.
Татарстан Республикасы Президенты сүзләренчә, соңгы еллардагы һава торышының уңайсыз булуына карамастан, быел Татарстан үзенең потенциалын саклап кала алды һәм 5 млн. тоннадан артык бөртекле ашлык җыйды. «Без шулай ук шикәр чөгендеренең рекордлы уңышына өмет итәбез – 2,8 млн. тоннадан артык, бу күрсәткечне 3 миллионга җиткерү мөмкинлеге бар. Республика сөт терлекчелеге буенча танылган лидер. 2017 елда сөт барлыгы 1,8 млн. тонна җитештереләчәк, үсеш – 2,2 процент, 500 мең тоннага якын терлек һәм кош ите җитештереләчәк», - диде Рөстәм Миңнеханов.
Татарстан – республиканың агросәнәгать комплексы бүген ил төбәкләре арасында халкын төп продукция төрләре белән тәэмин итүчеләрнең берсе, шуның шактый өлешен илнең башка төбәкләренә дә чыгара, диде Рөстәм Миңнеханов: «Бу – меңләгән агрономнар, терлекчеләр, механизаторлар, ветеринарлар коллективларының тырыш хезмәте һәм төпле гамәлләре нәтиҗәсе. Безнең кешеләр – авылның төп байлыгы!».
Татарстанда кече хуҗалык рәвешләренә дә зур игътибар бирелә, дип ассызыклады Татарстан Республикасы Президенты Рөстәм Миңнеханов. Бүген төбәктә 450 меңләп шәхси ярдәмче хуҗалык, 4 мең 700 фермер хуҗалыгы, 1 мең 200 гаилә фермасы уңышлы эшли. Аларга республика авыл хуҗалыгы продукциясенең яртысы туры килә.
Республикада эре инвестицион проектлар гамәлгә ашырыла. 2017 елда терлекчелек объектларын, элеваторларны, теплица комплексларын төзү һәм яңарту эше дәвам итә. Авыл хуҗалыгы продукциясен саклау һәм эшкәртү инфраструктурасы үсә.
«Соңгы елларда авыл халкының тормыш шартларын яхшырту буенча авылга юнәлешле 37 программа эшли. Монда мәгариф һәм спорт объектлары төзелә, килер юллар салына, медицина учреждениеләре һәм мәдәният объектлары корыла», - диде Татарстан Президенты.
Рөстәм Миңнеханов тармак ветераннарына, энергетикларга, машина төзүчеләргә һәм транспортчыларга аерым рәхмәтләрен җиткерде.
Аннары Татарстан Республикасы Президенты авыл хуҗалыгының тырыш хезмәткәрләренә Татарстан Республикасы дәүләт бүләкләрен тапшырды.
Тантана барышында шулай ук Татарстан Республикасы Дәүләт Киңәшчесе Минтимер Шәймиев та авыл хуҗалыгы хезмәткәрләрен бәйрәм белән котлады. «Бүген ирешелгән нәтиҗәләрдә өлкән буыннарның, безнең аталарыбызның, бабаларыбызның да өлеше зур. Моны онытырга ярамый. Бүгенге бәйрәм – Татарстан игенчеләренең, терлекчеләренең һәм тармакның башка бик күп белгечләренең уртак хезмәт бәйрәме», – диде Минтимер Шәймиев.
Татарстан Республикасы Президенты Рөстәм Миңнеханов исеменә килгән телеграммада Россия Авыл хуҗалыгы министры Александр Ткачев та тармак хезмәткәрләрен һөнәри бәйрәмнәре белән котлаган.
Татарстан Республикасы Премьер-министры урынбасары – Татарстан Республикасы авыл хуҗалыгы һәм азык-төлек министры Марат Әхмәтов авыл хезмәтчәннәренә авыр да, шул ук вакытта мактаулы хезмәтләре өчен рәхмәт белдерде. «Әлбәттә, бу ел уңышлы булды, әмма авыл хуҗалыгының мөмкинлекләре тагын да зуррк булуын без аңлыйбыз. Без әле аерым районнарның һәм хуҗалыкларның эш йомгакларына җентекләп анализ ясаячакбыз, чөнки күрсәткечләр бак аерыла. Ирешелгән күрсәткечләр – алдагы үсеш өчен нигез», – дип ассызыклады Марат Әхмәтов.
Авыл хезмәтчәннәре өчен Татарстан Республикасының иҗат коллективлары катнашында бәйрәм концерты оештырылган иде. «Бик матур бәйрәм, бүләк алуы да күңелле булды», – диде Кама Тамагы муниципаль районының “Идел” ҖЧҖеннән механизатор Александр Гундоров, аңа бүген “Татарстан Республикасының атказанган механизаторы” дигән мактаулы исем бирелү турында таныклык тапшырылды. «Мин механизатор булып 1975 елдан бирле эшли инде. Октябрьдә миңа 60 яшь тула, – дип сөйләде Александр Гундоров. – Язын чәчүдә, көзен җир эшкәртүдә. Өлкән улым да минем эздән китте, икенче улым һәм кызым Казанда. Мин аларга бүләк турында хәбәр иттем, алар да бик шатландылар. Безнең хезмәтне шулай бәяләүләре сөендерә».