Республиканың Бөгелмә муниципаль районында терлек азыгы әзерләү дәвам итә

Татарстан Республикасының Бөгелмә муниципаль районында терлек азыгы әзерләү дәвам итә. «Терлекләр уңышлы кышласын өчен 8 мең тонналап печән, 17 мең тонна сенаж, 18 мең тонна силос һәм 6 мең тонналап салам әзерләргә кирәк. Һава шартлары тулы куәткә эшләргә ирек бирмәү аркасында хәзер авыл хезмәтчәннәре сенаж салу белән мәшгуль. Бүгенгә ул 8 мең тоннадан артык әзерләнгән, печән – 1100 тонна», – дип сөйләде район авыл хуҗалыгы һәм азык-төлек идарәсенең җитештерү-маркетинг бүлеге консультанты Илнур Миңнегалиев.

Аның сүзләренә караганда, «Наратлы», «Колос», «Рассвет» хуҗалыкларында эш яхшы оештырылган.

«Әлегә һава шартлары җәелеп эшләргә ирек бирми, – диде “Муса Җәлил” ис. ҖЧҖ директоры Харис Әхмәтгәрәев. –Сенаж һәм силос әзерләү белән проблема булмас, аларны 5 меңәр тонна салырга кирәк. Ни булса да, без кышка җитәрлек итеп 1200 тонна печән әзерләячәкбез. Әле узган елдан калган запас та бар, шуңа күрә терлекләр ач булмас».