Республиканың Чүпрәле районында 2017 елның 5 ае өчен терлекчелек тармагы эшенә йомгаклар ясадылар

Татарстан Республикасы Чүпрәле муниципаль районында 2017 елның 5 ае өчен терлекчелек тармагы эшенә йомгаклар ясадылар. Киңәшмә район башлыгы Александр Шадриков рәислегендә узды.

Чарада районның Авыл хуҗалыгы һәм азык-төлек идарәсе башлыгы Ирек Мөхәммәтҗанов, хуҗалыклар җитәкчеләре һәм белгечләре катнашты.

Терлекчелек тармагы күрсәткечләре турындагы нотык белән районның Авыл хуҗалыгы һәм азык-төлек идарәсе башлыгы Ирек Мөхәммәтҗанов чыгыш ясады.Аның чыгышыннан күренгәнчә, 5 ай эчендә районда 102,4 тонна сөт җитештерелгән. Май йомгаклары буенча бер сыердан уртача 506 кг алынган. Кайбер хуҗалыкларда бу күрсәткеч күпкә югарырак, мәс.: «Чынлы» ҖЧҖендә – 877 кг, «Ак Барс Чүпрәле” ҖЧҖенең «Городище» һәм «Яңа Әлмәле» филиалларында – 772 һәм 710 кг сөт савылган.

Район башлыгы Александр Шадриков терлекләр өчен азык әзерләү мәсьәләләренә тукталды. «Печән һәм сенаж сыйфатлы булырга, куелган барлык таләпләргә туры килергә тиеш», – диде ул, ассызыклап.

Киңәшмә барышында азык әзерләү техникасының эшли башларга әзер булуы турында да әйтелде. Район игенчеләре 5-6 көннән күпьеллык үлән чаптыруга керешәчәкләр, дип көтелә.

Киңәшмә азагында тармак алдынгыларын бүләкләделәр. Түбәндәгеләр акчалата премияләр белән бүләкләнделәр: «Ак Барс Чүпрәле” ҖЧҖенең «Яңа Әлмәле» филиалы директоры Феолет Садыйков, «Эталон – Агро» ҖЧҖенең сөт-товар фермасы мөдире Рәмис Абдракипов, «Ак Барс Чүпрәле” ҖЧҖенең «Татар Бизнәсе» филиалы ветеринария табибы Рәфис Тимербулатов һәм “Чынлы” ҖЧҖенең терлек үрчетү буенча технологы Энже Саттарова.