Татарстан Республикасы Азнакай муниципаль районында узган зона семинарында 9 айда терлекчелек эшенә йомгаклар ясалды һәм терлекләрне кышкы чорга күчерүне оештыру мәсьәләләре каралды
Кичә, 21 октябрьдә, Татарстан Республикасы Азнакай муниципаль районында зона семинар-киңәшмәсе узды, анда 9 айда терлекчелек эшенә йомгаклар ясалды, терлекләрне кышкыга күчерүне оештыру мәсьәләләре каралды һәм кышкы чорга бурычлар билгеләнде.
Семинарда Татарстан Республикасы авыл хуҗалыгы һәм азык-төлек министрының терлекчелек буенча урынбасары Нәҗип Хаҗипов, Татарстан Республикасы Авыл хуҗалыгы һәм азык-төлек министрлыгы белгечләре, Татарстан Республикасы Министрлар Кабинетының Баш ветеринария идарәсе башлыгы Алмаз Хисаметдинов, Татарстан Республикасы Азнакай муниципаль районы башлыгы Марсель Шәйдуллин, «Агросила Групп» ЯАҖ генераль директоры Фәнис Газетдинов, эре авыл хуҗалыгы предприятиеләре директорлары, баш ветеринария табиблары, Татарстан Республикасы муниципаль районнарындагы бүлекчәләр һәм филиаллар, ветеринария хезмәтләре, авыл хуҗалыгы һәм азык-төлек идарәләре җитәкчеләре катнашты. Семинарда шулай ук Азнакай, Альметьевск, Баулы, Бөгелмә, Лениногорск,Чирмешән, Ютазы муниципаль районнары вәкилләре катнашты.
Семинарның пленар утрышы район Мәдәният йортында узды, аны Азнакай муниципаль районы башлыгы Марсель Шәйдуллин ачты. Ул кунакларны Татарстан Республикасы Кама Тамагы муниципаль районындагы төп үсеш юнәлешләре белән таныштырды.
«Агросила Групп» ЯАҖнең генераль директоры Фәнис Газетдинов агрохолдингта терлекчелек тармагын үстерү перспективалары белән таныштырды. «Агрохолдинг алдында гаять зур бурычлар куелды, шулар арасында - сөт терлекчелеген яңарту, яңа сөтчелек фермалары төзү, савымны арттыру», - диде ул.
Аннары Татарстан Республикасы авыл хуҗалыгы һәм азык-төлек министрының терлекчелек буенча урынбасары Нәҗип Хаҗипов октябрь башына терлекчелектәге үсеш буенча хуҗалыклар эшчәнлекләренең нәтиҗәләре турында мәгълүмат бирде, авыл хуҗалыгы предприятиеләренең хаталарын күрсәтеп китте, сөт җитештерү күрсәткечләренә җентекләп тукталды.
Семинарның практик өлеше «Азнакай» агрофирмасы» ҖЧҖнең Тымытык сөтчелек-товар фермасында узды. Катнашучылар савым сыерларын карау, ашату, аларга ветеринария хезмәте күрсәтү чаралары (тоякларын эшкәртү, маститка тикшерү) белән таныштылар, ясалма аталандыру пунктын карадылар.