Рөстәм Миңнеханов Казанның яңартылган Мәскәү базарында булды
Бүген Татарстан Республикасы Рәисе Рөстәм Миңнеханов Казанның яңартылган Мәскәү базарында булды.
Мәскәү базарында барлык системаларны яңартуга кагылышлы реконструкция үткәрелде: коммуникацияләр алыштырылган, антресольләр ныгытылган һәм киңәйтелгән, витраж пыялалары һәм гөмбәз өслеге алыштырылган. Бинада заманча вентиляция һәм кондиционер системасы урнаштырылган. Шулай ук сәүдә витриналары урнаштырылган, склад бүлмәләре модернизацияләнгән һәм ветеринария лабораториясе яңартылган.
Базар 2025 елның 20 маенда тест режимында ачылды. Биредә амфитеатр һәм җәмәгать теплицасы, урам ярминкәсе һәм беренче яңартылган павильоннар барлыкка килгән, үз парковкасы ачылган. Җәй буена базарда балалар һәм өлкәннәр өчен йөздән артык чара узды, ә Мәскәү базарында йөзләрчә мең кеше кунаклар буларак килделәр.
Бүген Рөстәм Миңнеханов һәм аның белән бергә йөрүче затлар яңа павильоннарны, базар бинасын карап чыктылар.
Рөстәм Миңнеханов белән бергә базарның яңартылган территориясен һәм сәүдә павильоннарын Казан мэры Илсур Метшин, Татарстан Республикасы Премьер-министры урынбасары – Татарстан Республикасы авыл хуҗалыгы һәм азык-төлек министры Марат Җәббаров, Татарстан Республикасы төзелеш, архитектура һәм ТКХ министры Марат Айзатуллин, «Татарстан Республикасы шәһәрләрен үстерү институты» фонды директоры Наилә Зиннәтуллина һәм башкалар бәяләде.
Рөстәм Миңнеханов сатучылар белән аралашты – аяк киемнәре өчен олтыраклар кисеп куелган киезнең сыйфатын бәяләде, мунчалар өчен күрше төбәктән китерелгән имән һәм каен себеркеләренең ассортиментын өйрәнде, шулай ук атланмай, сыр продукциясе, бал һәм җиләк-җимеш белән тулы сәүдә киштәләрен карап чыкты. Аннары экскурсия ит рәтләре буйлап дәвам итте, анда хәләл продукция рәте дә бар иде.
Татарстан Рәисе һәм Казан Мэры шулай ук мичтә пешкән күмәчтән авыз иттеләр һәм шәһәр “бистро”ларының гастрокластеры белән таныштылар (2 катта), «Хәтирәләр лабораториясе» интерактив зонасында булдылар.