Министрлыкта Татарстанның агросәнәгать комплексы мәсьәләләре буенча киңәшмә узды
Бүген Татарстан Республикасы Авыл хуҗалыгы һәм азык-төлек министрлыгында Татарстан Республикасы Премьер-министры урынбасары - авыл хуҗалыгы һәм азык-төлек министры Марат Җәббаров рәислегендә Татарстан Республикасы агросәнәгать комплексы мәсьәләләре буенча видеоконференцэлемтә режимында киңәшмә узды. Анда министр урынбасарлары, муниципаль районнар башлыклары, авыл хуҗалыгы һәм азык-төлек идарәсе башлыклары, Министрлыкның бүлек башлыклары һәм эре инвесторлар катнашты.
Татарстан Республикасы Авыл хуҗалыгы һәм азык-төлек министры урынбасары Дмитрий Яшин, бөртеклеләрне җыю тәмамланды диярлек, дип хәбәр итте. Бүгенге көнгә 4 млн. 624 мең тонна ашлык суктырылган, уртача уңдырышлылык - 37,6 ц/га. Соңрак өлгерә торган культуралар - бәрәңге, шикәр чөгендере, майлы культуралар һәм кукуруз җыю актив бара. Алар 450 мең га мәйданда җыелырга тиеш.
АПКны инженер-техник тәэмин итү бүлеге башлыгы Илнар Габбасов кырларда туңга сөрү, авыл хуҗалыгы предприятиеләрендә хезмәтне саклау һәм техника паркын яңарту механизмы турында сөйләде.
Ул БПЛА ярдәмендә чәчүлекләрне эшкәртү турында җентекләп сөйләде. “Агымдагы елда республика хуҗалыкларында 31 мең гектарга якын мәйданда чәчүлекләрне пилотсыз очу системаларын кулланып эшкәртү планлаштырылган, шулардан 20 мең гектардан артыгы эшкәртелгән инде”, диде ул.
Аннары терлекчелек тармакларын үстерү бүлеге башлыгы Сирень Нигъмәтҗанов сөт җитештерү һәм терлек азыгы әзерләү буенча йомгаклар ясады.
“25 сентябрьгә 461 мең 807 тонна печән, 3 млн. 23 мең 580 тонна сенаж, 1 млн. 526 мең 281 тонна силос әзерләнгән. Соңгы атналарда урып-җыю өчен уңайлы һава торышы торды. Яңгырлар сезоны башланганчы силоска кукуруз җыю өчен техниканы һәм эшче персоналны мөмкин кадәр активлаштыруыгызны сорыйм”, - дип ассызыклады бүлек җитәкчесе.
Сирень Нигъмәтҗанов шулай ук терлекчелек һәм терлек азыгы җитештерү буенча зона семинарлары турында әйтеп узды, алар Әтнә районында 30 сентябрьдә һәм Алексеевск районында 2 октябрьдә булачак.
Министр урынбасары Рөстәм Гайнуллов кече хуҗалыкларга ярдәм итү программаларын гамәлгә ашыруның мөһимлеге турында сөйләде. Шәхси ярдәмче хуҗалыклардагы үзмәшгульләргә субсидияләр бирүне аерым билгеләп үтте.
Министр, йомгак ясап, Татарстан Республикасының терлекчелек предприятиеләрендә хезмәтне саклауны оештыруга һәм биологик иминлекне тәэмин итүгә игътибарны юнәлтте. Шулай ук авыл хуҗалыгы идарәләренә, Татарстан Республикасы Авыл хуҗалыгы һәм азык-төлек министрлыгы, Россия Авыл хуҗалыгы күзәтчелеге (Россельхознадзор) һәм Татарстан Республикасы Ветеринария хезмәте белән берлектә, актив һәм бердәм булып эшләргә өндәде.