Татарстанда Россия Федерациясе АПК хезмәткәрләре һөнәр берлегенең республика комитеты беренче ярдәм күрсәтү буенча тренинг оештырды
Шушы көннәрдә Россия Федерациясе АПК хезмәткәрләре һөнәр берлегенең республика комитеты район һәм башлангыч һөнәр берлекләре оешмалары рәисләре, шулай ук Татарстан Республикасы АПК оешмаларының хезмәтне саклау буенча вәкаләтле вәкилләре һәм белгечләре өчен уку оештырды. Чарада барлыгы 105 катнашучы булды. Тренингның максаты - төрле характердагы ашыгыч хәлләрдә беренче ярдәм күрсәтү буенча белемнәрне һәм күнекмәләрне арттырудан гыйбарәт иде.
Төп нотыкчы Нина Гурвич - танылган эксперт, Н.В. Склифосовский исемендәге Ашыгыч ярдәм фәнни-тикшеренү институты травматологы, беренче ярдәмне күрсәтүдә уникаль методикалар һәм үз алымнарын эшләгән зат. Практикум программасы гадәттән тыш хәлләр очракларында төрле медицина ысулларын куллануны үз эченә ала: гади имгәнү һәм мускуллар тартылу очракларыннан алып кеше аңын югалту, сөякләр сыну һәм көчле кан агу кебек җитди халәтләр очраклары карала.
Тренинг теорияне һәм практиканы берләштергән интерактив формада узды. Катнашучылар җәрәхәтләр вакытында ярдәм техникасын үзләштерделәр, һәлакәт очраклары инсценировкалары каралды һәм көзән җыеру яки аңны югалту кебек кичектергесез халәтләр барлыкка килгәндә ашыгыч ярдәм күрсәтү алымнарын өйрәнделәр. Беренче ярдәм күрсәткәндә кешеләр җибәрә торган типик хаталарны тикшерүгә аерым игътибар бирелде.
Практик өлештән тыш, беренче ярдәм күрсәтүче затның җаваплылыгына һәм бурычларына кагылышлы хокукый аспектларны өйрәнүгә дә зур игътибар бирелде. Тәҗрибәле укытучы Нина Гурвич беренче ярдәм күрсәтүне регламентлаучы гамәлдәге законнар һәм норматив актлар турында җентекләп сөйләде.
Тренингның үзенчәлеге - укыту процессына чынбарлыкка якын килү иде. Һәр катнашучы чикләнгән вакыт арасында чишелеш табып, үзен реаль экстремаль вәзгыятьтә тоярга мөмкинлек алды. Бу тәҗрибә һәр тыңлаучының җитештерүдә һәм көнкүрештә барлыкка килә торган төрле хәлләрне нәтиҗәле хәл итәргә әзер булуын шактый арттырырга ярдәм итәр.
Чарада катнашучылар, Россия Федерациясе АПК хезмәткәрләре һөнәр берлегенең республика комитетына һәм спикер Нина Гурвичка шундый мөһим һәм файдалы тренинг үткәргәннәре өчен ихластан рәхмәт белдереп, нотыкчының оештыру дәрәҗәсен һәм һөнәри осталыгын югары бәяләделәр.