Министрлыкта Корея Халык-Демократик Республикасы делегациясе булды
Бүген Татарстан Республикасы Авыл хуҗалыгы һәм азык-төлек министрлыгында Корея Халык-Демократик Республикасы делегациясе белән эшлекле очрашу узды. Анда министрның беренче урынбасары Ленар Гарипов, министр урынбасарлары Рөстәм Гайнуллов һәм Рафаэль Фәттахов, шулай ук «57нче Татар ат заводы» ҖЧҖ директоры Николай Скоков катнашты.
Делегация составына «Кымгил» икътисадый консорциумы идарәсе башлыгы Рю Сан Нам, «Чхоллима» сәүдә компаниясе вәкилләре Рян Сун Зин, Ра Юн Гук, Рю мен Хо, Кан Зон Хак һәм Хан Ген Зун, шулай ук Корея Халык-Демократик Республикасының Россия Федерациясендәге Илчелеге вәкиле Пак Сен Гук кергән.
Ленар Гарипов, Татарстан Республикасы нефть чыгару, нефть эшкәртү һәм нефть химиясе өлкәсендә илебезнең алдынгы төбәкләренең берсе, дип билгеләп үтте. “Бездә машина төзелеше һәм авыл хуҗалыгы актив үсә, фәнни-мәгариф үзәкләр төзелә һәм эшли. Татарстанның мәйданы - 68 мең км², ә халкы 4 миллионнан артыграк”, - диде ул.
Татарстанның тулаем төбәк продуктында агросәнәгать комплексы продукциясенең өлеше 7% тәшкил итә, диде ул. Республика үзен терлекчелек продукциясе белән тулысынча тәэмин итә. «Җан башына сөт буенча - нормадан 61%ка күбрәк, ит буенча - 18%ка, йомырка буенча 32%ка күбрәк җитештерәбез», — дип ассызыклады министрның беренче урынбасары.
«57нче Татар ат заводы» оешмасы хуҗасы Николай Скоков инде берничә ел Төньяк Корея лидеры Ким Чен Ынның кавалерия полкы өчен атлар җибәрә. Соңгы 7 елда КХДР кавалерия полкы өчен 15 баштан артык ат сатып алган.
Предприятие актив үсештә, бүгенге көндә хуҗалыкта төрле токымлы 300ләп ат бар: Орлов чабышкы ат аты, совет һәм рус йөк атлары. Ел саен 30 баштан артык колын туа. Ипподромда ел саен 15-20 баш терлек сынала. Аларның иң яхшылары Казан ипподромында тотыла, анда алар белән оста җайдаклар Ирина Бакурина, Дмитрий Булыгин, Марат Шәрифуллин, Марат Фәйзуллин һәм Азамат Абелев күнекмәләр уздыралар һәм аларны тәрбиялиләр.
Яклар агросәнәгать комплексында сәүдә-икътисадый мөнәсәбәтләрне ныгытуның мөһимлеген ассызыкладылар һәм уртак хезмәттәшлек перспективаларын билгеләделәр.
Очрашу азагында Ленар Гарипов 9 июльдән 11 июльгә кадәр узачак «Агроволга-2025» халыкара агросәнәгать күргәзмәсенә һәм 18-19 августта «РОСТКИ» халыкара бизнес-форумына чакырды.