Татарстан Республикасында туфракны нигезле эшкәртү чәчүлек мәйданнарының 87% башкарылды

Соңгы күрсәткечләр буенча, Татарстан Республикасында 2,07 млн. тонна шикәр чөгендере җир өстенә чыгарылды, шулардан 1,35 млн. тоннасы кырлардан җыеп алынды. Шикәр заводларында 720 мең тонна продукция эшкәртелде, 92 мең тонна шикәр җитештерелде. Бу хакта ТР Хөкүмәт Йортындагы республика киңәшмәсендә ТР Авыл хуҗалыгы һәм азык-төлек министрының беренче урынбасары Минсагир Нуретдинов җиткерде.
Видеоконференцэлемтә рәвешендә барлык муниципаль районнар белән киңәшмәне Татарстан Республикасы Президенты Рөстәм Миңнеханов үткәрде. Киңәшмә утырышында ТР Премьер-министрының беренче урынбасары Равил Моратов катнашты.
Минсагир Нуретдинов искә төшереп үткәнчә, Татарстан Республикасы кырларында кукуруз (9,5 мең гектардан җыярга калды), көнбагыш уңышын җыю дәвам итә. Көнбагыш 38,6 мең га мәйданда җыеп алынды, 52,5 мең тонна сугарылды, көнбагышның уртача уңдырышлылыгы 13,5 ц/га тәшкил итә.
Минсагир Нуретдинов әйтүенчә, туфракны нигезле эшкәртү 1810 мең га мәйданда башкарылды, бу чәчүлек мәйданнарының 87%ын тәшкил итә. ТР Авыл хуҗалыгы һәм азык-төлек министрының беренче урынбасары шулай ук авыл хуҗалыгы техникасын кышкы саклауга куюның барышы турында да хәбәр итте.

Татар-информ