Татарстанда бал кортларын пестицидлардан һәм агрохимикатлардан яклау өчен “Умартачы порталы” эшли башлады
Татарстан Республикасының Апас һәм Тәтеш муниципаль районнарында умартачылыкны үстерү мәсьәләләре буенча семинар-киңәшмәләр узды. Анда Татарстан Республикасы Авыл хуҗалыгы һәм азык-төлек министрлыгының умартачылык һәм аквакультура секторы мөдире Динард Гатауллин, республиканың муниципаль районнарындагы җирле үзидарә органнары һәм авыл хуҗалыгы һәм азык-төлек идарәләре вәкилләре, агросәнәгать предприятиеләре җитәкчеләре һәм умартачылар катнашты.
Киңәшмә барышында умарталарның сакланышын тәэмин итү, умартачылык продукциясе күләмнәрен арттыру, алына торган продукциянең сыйфатын арттыру, пестицидлар һәм агрохимикатлар кулланганда закон таләпләрен үтәү, авыл хуҗалыгы культураларын эшкәрткәндә биологик препаратлар куллану, баллы культуралардан яклау полосалары булдыру мәсьәләләре каралды.
Очрашу кысаларында катнашучылар умартачылыкны алып бару өчен урман фонды җирләрен бирү, умарталарның азык базасы мәйданнарын арттыру, ветеринария паспортларын рәсмиләштерү һәм умарта ояларын вакытында идентификацияләү (маркировкалау), шулай ук умартачыларны укыту һәм аларның квалификациясен күтәрү, умартачылык өлкәсендә кадрлар белән тәэмин ителеш, урта рус токымлы умарталарның генофондын саклау, умартачылык хуҗалыклары тарафыннан нәсел статусы алу, башка илләрдән умарта кортлары кайтару, биологик препаратларның нәтиҗәлелеген күрсәтү максатларында баллы культуралар чәчү өчен тәҗрибә кырлары булдыру мәсьәләләре буенча фикер алыштылар.
«Умартачы порталы» онлайн-платформасын файдалануга тапшыруга аерым игътибар бирелде, ул Россия авыл хуҗалыгы күзәтчелеге органының (Россельхознадзорның) пестицидлар һәм агрохимикатлар кулланылуын тикшереп тору буенча федераль дәүләт мәгълүмат системасы («Сатурн» ФДМС) базасында эшли.
«Умартачы порталы» системасы базасына көн саен авыл хуҗалыгы җитештерүчеләре тарафыннан пестицидлар куллану турындагы планнары, шулай ук аларның хәтәр үзенчәлекләре турында белешмәләр килеп тора. Бу планлаштырылган эшкәртүләрне реаль вакыт режимында күзәтеп торырга мөмкинлек бирәчәк.
Мәгълүмат алу өчен үзеңне кызыксындырган районны йә торак пунктны сайларга яисә түбәндәге параметрик фильтр блогыннан файдаланырга кирәк: «куллану чоры», «эшләрнең статусы», «кеше өчен куркынычлылык классы», «бал кортлары өчен куркынычлылык классы», «авыл хуҗалыгы культурасы».
«Умартачы порталы» онлайн-платформасы эше турында тулырак мәгълүмат белән түбәндәге сылтама буенча танышырга мөмкин: https://bee.fgis-saturn.ru/.