Киләчәктә кукурузны бөртеккә игү мәйданын арттыручы хуҗалыклар төрле яклап отачак

Әледән-әле явып торучы яңгырлар кыр эшләренә комачау итсә дә, республи­каның күп хуҗалыкла­рында җир эшкәртү белән беррәттән терлек азыгы әзерләү һәм техник культуралар уңышын җыеп алу оешкан төстә дәвам итә.
Әлки, Яшел Үзән, Югары Ослан, Биектау һәм башка районнарның кайбер ху­җалыклары, табигать капризларына баш бирмичә, көзге чәчү эшләрен инде тәмамлап та килә. Вакытында җир куенына кергән бөртекләрнең көзге кояш нурларында ныгып өлгер­гәне язын гадәттә дәррәү күтәрелә. Уңышы да башкаларыннан аерылып тора. Балтач, Кайбыч, Буа, Апас, Саба, Актаныш кебек район хуҗалыкларының ел саен мул уңыш алулары­ның сере дә шунда бугай.
Кукурузны дөньяның барлык почмакларында да яратып игәләр. Чыгымнарга килгәндә исә, ку­курузның бер гектарын игү өчен якынча гектарына 3-4 мең сум чамасы чыгым җитә, ди белгечләр. Уңышы исә быелгы кебек корылыклы елда да ашлыкка караганда берни­чә тапкыр артык – гектарын­нан 5-6 тонна була. Бу исә – кукурузны бөртеккә иккән ху­җалык бермә-бер ота дигән сүз. Ә инде корылыкка бирешми торган булуын исәпкә алганда, Татарстан хуҗалык­лары өчен ул аеруча зур әһәмияткә ия.
Күпләп терлек асраучы республика хуҗалыклары­нда Бөтендөнья Сәүдә Оешмасы шартларында терлекче­лектә чыгымнарны киметеп, табышны арттырыр өчен кукурузны бөртеккә игү – суга батучыга коткару боҗрасы сыман ул. Татарстан авыл хуҗа­лыгы фәнни-тикшеренү институты галимнәре әйтүен­чә, кукуруз үзенең биологик сый­фатлары, шул исәптән терлек организмы өчен аеруча файдалы матдәләргә бай булуы белән башка үсемлек­ләрдән күпкә отышлырак. Аның составында шикәр дә башка үсемлекләрдән бермә-бер күбрәк. Кукуруздан соң туфракның өске катламында шактый күләмдә файдалы микроорганизмнар калуы да – җир файдасына. Кыскасы, киләчәктә кукурузны бөртек­кә игү мәйданын арттыручы хуҗалыклар төрле яклап отачак, ди белгечләр.

“Ватаным Татарстан”