Әтнә районының “Күшәр” хуҗалыгында урып-җыю эшләре ахрына якынлаша
Әтнә районының “Күшәр” хуҗалыгы республикада беренчеләрдән булып, быелгы урып-җыюны төгәллиләр.
– Нибары 111 гектар мәйданда солы суктырасы калды, – дип шатлыгы белән уртаклашты хуҗалыкның агрономы һәм бер үк вакытта комбайнда эшләүче Динар Гарипов.
Игенчеләр урып-җыю эшләрен 10 көн эчендә башкарып чыктылар дисәк тә, ялгыш булмастыр мөгаен.
Урып-җыюны тоткарлыксыз тәмамлауга комбайн астыннан ындыр табагына ташучы шоферларның өлеше дә зур. “КамАЗ” шоферлары Вәдүт Хәкимҗанов, Азат Әхмәтов, “ГАЗ-53” рулен боручы Ирек Шаһиев нык тырыштылар. “Басу – амбар” юлын берөзлексез таптадылар.
“Бу – уртак тырышлык нәтиҗәсе. Урып-җыюны вакытында һәм сыйфатлы төгәлләүгә хуҗалыктагы һәркемнең өлеше керде. Намус белән, чын күңелдән эшләдек, – ди игенчеләр. Бу хакта “Әтнә таңнары” газетасы хәбәр итә.