Авыл хуҗалыгына кагылышлы барлык мәсьәләләр буенча Министрлыкның колл-үзәгендә консультация алырга мөмкин
Татарстан Республикасы Авыл хуҗалыгы һәм азык-төлек министрлыгында 8-800-444-16-70 бердәм кайнар линия телефоны эшләвен дәвам итә. Ул эшли башлаганнан бирле (2020 елның апрель аенда) Министрлык белгечләре 704 шалтыратуга җавап бирделәр. Мөрәҗәгать итүчеләрнең күпчелеген авыл хуҗалыгы җитештерүчеләренә һәм фермерларга дәүләт ярдәме чаралары кызыксындыра. Шулай ук торак мәсьәләләре, авыл хуҗалыгы предприятиеләрендә эшкә урнашу мөмкинлекләре һәм агросәнәгать тармагы турында төрле характердагы белешмә мәгълүмат актуаль булып чыкты.
Татарстан Республикасы Авыл хуҗалыгы һәм азык-төлек министрлыгының кайнар линиясе гражданнар өчен дә, авыл хуҗалыгы товарлары җитештерүчеләр өчен дә эшли. Күрсәтелгән телефон аша терлекчелек, үсемлекчелек, агроиминләштерү, авыл хуҗалыгы техникасы сатып алу, АПКны цифрлаштыру, дәүләт ярдәме чаралары, субсидияләр, максатчан укыту, ташламалы шартларда торак сатып алу һ.б.лар буенча консультация алырга, шулай ук шикаятьләр, тәкъдимнәр калдырырга мөмкин.
Телефон Татарстан Республикасы Авыл хуҗалыгы һәм азык-төлек министрлыгының эш графигы нигезендә дүшәмбе-пәнҗешәмбе көннәрендә -8.00 сәгатьтән 17.00 сәгатькә кадәр һәм җомга көнне 8.00 сәгатьтән 15.45 сәгатькә кадәр эшли.
Шуңа игътибар итегез, колл-үзәк эшен яхшырту һәм иң актуаль мәсьәләләрне анализлау максатында, барлык сөйләшүләр яздырып барыла.