Казанда авыл хуҗалыгы ярмминкәләре узды
Бүген, гадәттәгечә, иртәнге сәгать 6дан Казанда авыл хуҗалыгы ярминкәләре ачылды. Көннең салкынча булуы шәһәрлеләрне ярминкәгә барудан туктатып кала алмады. Күпләр өчен шимбә көнне ярминкәгә бару күркәм традициягә әверелде. Күп сатып алучылар Яңа елга һәм башка гаилә тантаналарына әзерләнә, бәйрәм табынына күркә, каз һәм үрдәкләр сатып ала. Ярминкәләр мондый продукциягә бай. 15 сәүдә мәйданчыгында шулай ук Арча, Кукмара, Балтач, Кайбыч, Югары Ослан, Биектау, Буа, Кама Тамагы, Теләче, Лаеш, Апас һәм Зеленодольск районнарыннан китерелгән ит, балык, сөт, май, бал, казылык, сыр, йомырка, бәрәңге, яшелчә, җиләк-җимеш, шикәр комы, он, авыл каймагын сатып алырга мөмкин иде – алар барысы да кулай бәяләрдән һәм җирле җитештерүчеләр продукциясе.
Пенсионерларны барлык мәйданчыкларда кайнар чәй белән сыйладылар. Әлбәттә инде, концерт программасы турында да онытмадылар.
Беркетелгән мәйданчыкларда ярминкәләрне Татарстан Республикасы авыл хуҗалыгы һәм азык-төлек министры урынбасарлары, муниципаль районнар башлыклары, АПК бүлекчәләре җитәкчеләре һәм Министрлык белгечләре тикшереп чыктылар. Барлык продукция ветеринария хезмәте оешмалары тарафыннан тикшерелгән иде.
Шуны әйтергә кирәк, шимбә көннәрендә Татарстан Республикасы Авыл хуҗалыгы һәм азык-төлек министрлыгы тарафыннан оештырыла торган авыл хуҗалыгы ярминкәләре зур социаль әһәмияткә ия. Фермерлар өчен – үзләре җитештергән продукцияне сату мөмкинлеге булса, шәһәр халкы өчен - бер урында һәм арзан бәяләрдән иң кирәкле һәм иң сыйфатлы әйберләрне сатып алу мөмкинлеге ул. Ярминкәләрне оештыру Министрлык белгечләреннән зур хезмәт куюны таләп итүгә карамастан, мондый социаль әһәмияткә ия чараларны оештыру, һичшиксез, алга таба да дәвам итәчәк.
Сатып алучыларны киләсе шимбә көнне авыл хуҗалыгы ярминкәләрендә көтеп калабыз!