Район хәбәрләре: Минзәлә районына Дания һәм Эстониядән нәселле таналар кайтарылган
«Камский бекон» авыл хуҗалыгы предприятиесе - Россиянең иң эре дуңгызчылык предприятиеләренең берсе. Компания эшчәнлегенең төп юнәлешләре - үсемлекчелек, сөт терлекчелеге, сугым һәм итне беренчел эшкәртү.
Быел көз Минзәлә районының «Кама беконы» хуҗалыгына Эстониядән 205 баш нәселле тана кайтарылган, ә шушы көннәрдә Даниядән голштино-фриз токымлы 292 баш тана кайткан. Аларның һәрберсе елга 8 - 10 мең килограммга кадәр сөт бирә.
Татарстан Республикасы Авыл хуҗалыгы һәм азык-төлек министрлыгы белешмәләренә караганда, сыерларның бер өлеше быел капиталь ремонтланган Балтай сөтчелек комплексына урнаштырылган инде. Моннан тыш, Степановка авылы янындагы "Август-Мөслим" ҖЧҖендә бар куәткә 2400 башка исәпләнгән савым комплексы төзелә, киләсе елда 3600 башка исәпләнгән тагын бер шундый комплекс төзү планлаштырыла.